পৰিয়ালৰ বাবে অশ্বিনে আধাতে সামৰিলে আইপিএল !

কৰ’ণা মহামাৰীক লৈ জাৰি কৰা নিৰ্দেশ অনুসৰি, যদি এজন খেলুৱৈয়ে মাজতে খেলৰ পৰা বিৰতি লয়, তেন্তে তেওঁ পুনৰ কোৱাৰেণ্টাইন হ’ব লাগিব ৷ উদাহৰণস্বৰূপে, যদি অশ্বিনে দিল্লী কেপিটেলছত পুনৰ যোগদান কৰিব বিচাৰে, তেন্তে তেওঁ পুনৰবাৰ কোৱাৰেণ্টাইন হ’ব লাগিব ৷

স্পৰ্টছ ডেস্ক,26 এপ্ৰিল: দিল্লী কেপিটেলছক প্ৰতিনিধিত্ব কৰি থকা ভাৰতীয় অফ স্পীনাৰ ৰবিচন্দ্ৰন অশ্বিনে চলিত আইপিএলৰ পৰা বিৰতি লৈছে ৷ কিয়নো অশ্বিনৰ পৰিয়াল আক্ৰান্ত হৈছে ক’ভিড-19 ত ৷ সম্প্ৰতি খেলুৱৈগৰাকীয়ে পৰিয়ালৰ সৈতে সময় কটাব বিচাৰিছে ৷

দেওবাৰে ছানৰাইজাৰ্ছ হায়দৰাবাদৰ বিৰুদ্ধে অশ্বিনৰ দল দিল্লী কেপিটেলছে চুপাৰ অ’ভাৰত জয় লাভ কৰাৰ পাচত টুইটযোগে অশ্বিনে প্ৰকাশ কৰে যে, সম্প্ৰতি তেওঁৰ পৰিয়ালটো ক’ভিড মহামাৰীৰ সৈতে যুঁজি আছে ৷ গতিকে তেওঁ খেলৰ পৰা বিৰতি লৈছে ৷ যিহেতু এই কঠিন সময়ত তেওঁ পৰিয়ালৰ সৈতে থাকিব বিচাৰে ৷

অৱশ্যে সকলোবোৰ ঠিকেই থাকিলে পুনৰ খেলত যোগদান কৰিব বুলিও মন্তব্য কৰে ৷ অশ্বিনে দিল্লী কেপিটেলছক ইমানদিনে আগবঢ়োৱা সহায়-সহযোগিতাৰ বাবে ধন্যবাদ জ্ঞাপন কৰে ৷

ইতিমধ্যে চলিত আইপিএলৰ 5 খনকৈ মেচত অংশগ্ৰহণ কৰিছে অশ্বিনে ৷ 147 গড়ত এটা উইকেট দখল কৰিছে বলাৰগৰাকীয়ে ৷ তেওঁৰ ইক’নমিক হাৰ হৈছে 7.73 শতাংশ ৷

লগতে পঢ়ক :সোমবাৰে কৰ্ণাটকৰ লক ডাউনৰ সিদ্ধান্ত গ্ৰহণৰ সম্ভাৱনা