স্পৰ্টছ ডেস্ক,২৪ অক্টোবৰ :চলিত বিশ্বকাপত আফগানিস্তানে সকলো ক্ৰিকেটপ্ৰেমীকে আচৰিত কৰি তুলিছে । প্ৰথমে ডিফেণ্ডিং চেম্পিয়ন ইংলেণ্ডক পৰাস্ত কৰি বিশ্ব ক্ৰিকেটত খলকনিৰ সৃষ্টি কৰিছিল আফগানিস্তানে । এইবাৰ পাকিস্তানক ৮ উইকেটৰ ব্যৱধানত পৰাস্ত কৰি আন এক অভিলেখ সৃষ্টি কৰিছে । সোমবাৰে চেন্নাইৰ এম এ চিদাম্বৰম ষ্টেডিয়ামত অনুষ্ঠিত লীগ পৰ্যায়ৰ খেলখনত আফগানিস্তানে পাকিস্তানক পৰাস্ত কৰে ।
৫০ অভাৰৰ ফৰ্মেটত পাকিস্তানৰ বিৰুদ্ধে আফগানিস্তানৰ এয়া প্ৰথম বিজয় । এই বিজয়ৰ পাছতে আফগানিস্তানৰ খেলুৱৈসকলৰ মাজত ব্যাপক উছাহ দেখিবলৈ পোৱা গৈছে । খেলপথাৰত খেলুৱৈসকলে নাচি নাচি বিজয় উদযাপন কৰে । ইফালে আফগানিস্তানৰ স্পিনাৰ ৰাছিদ খানক বিজয় উদযাপনত সহযোগ কৰে ভাৰতৰ প্ৰাক্তন খেলুৱৈ ইৰফান পাঠানে । ৰাছিদ খানৰ সৈতে খেলপথাৰত নাচিলে পাঠানেও ।
ইতিমধ্যে চলিত বিশ্বকাপ ২০২৩ত আগফানিস্তানে দুখনকৈ গুৰুত্বপূৰ্ণ খেলত জয়ী হৈছে । যাৰ দ্বাৰা তেওঁলোকে প্ৰমাণ কৰিছে যে আফগানিস্তানক কোনো কাৰণতে সহজভাৱে ল'ব নোৱাৰি ।