ICC World Cup 2023 : ৰোহিতে নিজৰ বেটিঙেৰে আদৰ্শ দাঙি ধৰিছে; জাদেজা এজন বিশেষ খেলুৱৈ : সঞ্জয় জগদালে

প্ৰাক্তন ক্ৰিকেটাৰ তথা ৰাষ্ট্ৰীয় বাছনি সমিতিৰ প্ৰাক্তন সদস্য সঞ্জয় জগদালেই ইটিভি ভাৰতৰ পুষ্কৰ পাণ্ডেৰ সৈতে এক বিশেষ সাক্ষাৎকাৰত চলিত বিশ্বকাপত ভাৰতীয় দলৰ প্ৰদৰ্শনৰ বিষয়ে কয় ৷ একেৰাহে আঠখন খেলত জয়লাভ কৰি এই টুৰ্ণামেণ্টত এতিয়ালৈকে অপৰাজিত হৈ আছে দলটো ৷ ভাৰতীয় দলৰ শক্তিশালী প্ৰদৰ্শনৰ আঁৰৰ ৰহস্য ব্যক্ত কৰে জগদালে।

স্পৰ্টছ ডেস্ক, 6 নৱেম্বৰ : চলিত ক্ৰিকেট বিশ্বকাপত ভাৰতে শক্তিশালী প্ৰদৰ্শনেৰে ছেমি ফাইনেলত স্থান নিশ্চিত কৰিছে ৷ এই পৰ্যন্ত লীগ পৰ্যায়ৰ আঠখন মেচৰ আটাইকেইখনতে জয়লাভ কৰি ভাৰতে এক অভিলেখ স্থাপন কৰিছে ৷ ইফালে ৰাষ্ট্ৰীয় বাছনি সমিতিৰ প্ৰাক্তন সদস্য সঞ্জয় জগদালেই মেন ইন ব্লুৰ এই বিস্ফোৰক প্ৰদৰ্শনত সন্তুষ্টি প্ৰকাশ কৰে ৷ মধ্যপ্ৰদেশৰ হৈ ঘৰুৱা ক্ৰিকেটত 53 খন মেচ খেলা সঞ্জয় জগদালেই ভাৰতৰ ভাল প্ৰদৰ্শনৰ কাৰণ দলৰ ভাৰসাম্যতা বুলি কয় ৷

তেওঁ কয় "টিম ইণ্ডিয়াৰ বলিং সকলো পৰিস্থিতিৰ বাবে ভাল ৷ আঘাতৰ বাবে এই টুৰ্ণামেণ্টৰ পৰা বাদ পৰা অল ৰাউণ্ডাৰ হাৰ্দিক পাণ্ডিয়াৰ অনুপস্থিতিত দলৰ ভাৰসাম্যৰ কিছু অৱনতি ঘটিছে ৷ ভাৰতৰ ষষ্ঠ বলিং বিকল্প আৰু আক্ৰমণাত্মক বেটাৰ হাৰ্দিকক বাহিৰ কৰা হৈছে, কিন্তু তেতিয়াও দলটোৱে ভাল প্ৰদৰ্শন কৰিছে ৷ দলৰ প্ৰতিজন খেলুৱৈয়ে তেওঁক দিয়া দায়িত্ব নিখুঁতভাৱে পালন কৰি আছে, সেয়েহে এইয়া সম্ভৱ হৈছিল ৷"

ৰোহিত শৰ্মাই উদাহৰণ দাঙি ধৰিছে-

এই বিশ্বকাপত অধিনায়ক ৰোহিত শৰ্মাই আগ্ৰাসী বেটিঙেৰে আদৰ্শ দাঙি ধৰিছে বুলি সঞ্জয় জগদালেই কয় ৷ "ৰোহিতৰ বিশ্বকাপৰ অভিলেখ (বেটছমেন হিচাপে) উৎকৃষ্ট ৷ ইয়াৰ বাহিৰেও তেওঁ অধিনায়ক হিচাপেও ভাল প্ৰদৰ্শন আগবঢ়াইছে ৷ তেওঁ নিজৰ বেটিঙেৰে টেম্পো নিৰ্ধাৰণ কৰে, যাৰ ফলত মিডল অৰ্ডাৰত হেঁচা নপৰে ৷ তেওঁৰ আক্ৰমণাত্মক বেটিংৰ বাবে বলটো কোমল হৈ পৰে, যাৰ ফলত পিছৰ বেটছমেনসকলে ৰাণ সংগ্ৰহ কৰাটো সহজ হৈ পৰে ৷” বিচিচিআইৰ প্ৰাক্তন সম্পাদক হিচাপেও কৰ্মৰত জগদালে মতামত দিয়ে ৷

চলিত ক্ৰিকেট বিশ্বকাপত 442 ৰাণেৰে চতুৰ্থ সৰ্বাধিক ৰাণ সংগ্ৰহকাৰী হৈ আছে ৰোহিত শৰ্মা ৷ সন্মুখৰ পৰা নেতৃত্ব দি অধিনায়কজনে শুভমন গীলৰ সৈতে দলটোক এক আক্ৰমণাত্মক আৰম্ভণি দিছে ৷

ঘৰুৱা খেলত সৌৰাষ্ট্ৰৰ হৈ খেলা আৰু দেওবাৰে ইডেন গাৰ্ডেনত দক্ষিণ আফ্ৰিকাৰ বিৰুদ্ধে দলটোৱে 243 ৰাণত জয় লাভ কৰাত গুৰুত্বপূৰ্ণ ভূমিকা পালন কৰা অলৰাউণ্ডাৰ ৰবীন্দ্ৰ জাডেজাকো জগদালে প্ৰশংসা কৰে ৷

দলৰ বাবে জাডেজা বিশেষ-

সঞ্জয় জগদালেই অল ৰাউণ্ডাৰ ৰবীন্দ্ৰ জাডেজাৰ শক্তিশালী প্ৰদৰ্শনৰো শলাগ লয় ৷ তেওঁ কয় যে তেওঁৰ দৰে খেলুৱৈ প্ৰতিটো দলৰ বাবে বিশেষ ৷ বেটিং হওক, বলিং হওক বা ফিল্ডিং হওক, তেওঁ প্ৰতিখন ফিল্ডতে আচৰিত ৷ তেওঁ দলটোক এক বৃহৎ ভাৰসাম্য প্ৰদান কৰে ৷ তেওঁ দলৰ বাবে সদায় উপলব্ধ ৷" জগদালে মন্তব্য কৰে ৷

10 অভাৰৰ ভিতৰতে খেলখন টানি অনা হয়-

দেওবাৰৰ খেলখনত ভাৰতে দক্ষিণ আফ্ৰিকাক 243 ৰাণত পৰাস্ত কৰে ৷ এতিয়ালৈকে প্ৰতিখন মেচতে বিশাল স্কৰ সংগ্ৰহ কৰি অহা দক্ষিণ আফ্ৰিকাৰ দলটোৱে মাত্ৰ 83 ৰাণ সংগ্ৰহ কৰি অল আউট হৈছিল ৷

সঞ্জয় জগদালেই কয় যে ভাৰতে এই মেচখন প্ৰথম 10 অভাৰতে জয়ী হৈছিল ৷ দক্ষিণ আফ্ৰিকাৰ দলটোৱে ৰাণ অনুসৰণ কৰোঁতে সদায় উজুটি খায় ৷ দেওবাৰৰ মেচখনত ভাৰতে 300ৰো অধিক স্ক'ৰ কৰিছিল ৷ এইটো আৰামত বেটিং কৰিব পৰা উইকেট নাছিল ৷ কিন্তু শুভমন গীল আৰু ৰোহিত শৰ্মাই মেচখন ভাৰতৰ ফালে ঘূৰাই আনিছিল ৷" 73 বছৰীয়া প্ৰাক্তন প্ৰশাসকগৰাকীয়ে কয় ৷

ইংলেণ্ড দলটোৱে ভাৰতত তিষ্ঠিব নোৱাৰিলে-

চলিত বিশ্বকাপত ডিফেণ্ডিং চেম্পিয়ন ইংলেণ্ডৰ প্ৰদৰ্শন অতি দুৰ্বল আছিল আৰু জ’ছ বাটলাৰৰ নেতৃত্বত থকা দলটোৱে মাত্ৰ এখন মেচত জয় আৰু ছখন মেচত পৰাজয়েৰে পইন্ট তালিকাৰ একেবাৰে তলত অৱস্থান কৰিছে ৷

ইয়াৰ আঁৰৰ কাৰণ কি হ’ব পাৰে সেই সন্দৰ্ভত সঞ্জয় জগদালেই নিজৰ মতামত প্ৰকাশ কৰে ৷"ইংলেণ্ডৰ দলটো অতি ভাৰসাম্যপূৰ্ণ যেন লাগিছিল ৷ তেওঁলোকৰ দলৰ জ’ছ বাটলাৰ আৰু বেন ষ্ট'কছৰ ভাৰতত খেলাৰ বহু অভিজ্ঞতা আছে ৷ কিন্তু এই বিশ্বকাপত ইংলেণ্ডৰ দলটো ভাঙি যোৱা যেন লাগিছিল ৷ সঠিক সময়ত ফৰ্মত আহিব পৰা নাছিল ৷ লগতে তেওঁলোকে ভাৰতত দলৰ ভাৰসাম্য ৰক্ষা কৰিব নোৱাৰিলে ৷" সঞ্জয় জগদালেই কয় ৷

লগতে পঢ়ক :Virat Kohli 49th ODI hundred: খেলৰ সময়ত আবেগ নিয়ন্ত্ৰণ কৰাটো অতি গুৰুত্বপূৰ্ণ: কোহলী