গুৱাহাটী, 4 ছেপ্তেম্বৰ : জুবিন গাৰ্গৰ বহু প্ৰত্যাশিত ছবি 'কাঞ্চনজংঘা'ৰ মুক্তিৰ বাবে মাজত মাথো এটা দিন বাকী ৷ সেয়েহে দিনে - নিশাই ছবিখনৰ প্ৰচাৰৰ বাবে ব্যস্ত হৈ পৰিছে জুবিন গাৰ্গ ৷ বুধবাৰে মহানগৰীৰ ৰয়েল গ্ল'বেল ইউনিভাৰ্চিটি, অসম অভিযান্ত্ৰিক মহাবিদ্যালয় আৰু গুৱাহাটী বিশ্ববিদ্যালয়ত প্ৰচাৰ অভিযান চলাই জুবিন গাৰ্গ আৰু কাঞ্চনজংঘা টীমে ৷ জুবিনৰ উপস্থিতিৰ কথা জানিব পাৰি শিক্ষাৰ্থীয়ে ভিৰ কৰে শিক্ষানুষ্ঠান খনত ৷ বিগ বাজেটৰ অসমীয়া ছবিখন সকলোকে চাবলৈ অনুৰোধ জনাই জুবিনে ৷
'কাঞ্চনজংঘা'ৰ প্ৰচাৰ অভিযানত জুবিন গাৰ্গ ইফালে, কাঞ্চনজংঘাৰ অন্যতম জনপ্ৰিয় গীত 'ধূলিকণা' শীৰ্ষক গীত গাই উপস্থিত ছাত্ৰ - ছাত্ৰীক মোহিত কৰে জুবিনে । টীম কাঞ্চনজংঘাৰ লগত একেলগে উপস্থিত থাকে জনপ্ৰিয় অভিনেতা যতীন বৰা । 6 ছেপ্টেম্বৰত কাঞ্চনজংঘা চোৱাৰ পাছতে সকলোকে 11 ছেপ্তেম্বৰৰ দিনা ৰত্নাকৰ চাবলৈ আহ্বান জনাই যতীন বৰাই । অসমীয়া ছবিৰ উত্তৰণৰ হকে যুৱ প্ৰজন্মক ছবিগৃহলৈ আহি চিনেমা চাবলৈ আহ্বান জনাই বৰাই । বৃহস্পতিবাৰে জালুকবাৰীৰ ভূপেন হাজৰিকা সমাধিক্ষেত্ৰৰ সন্মুখৰ পৰা চানমাৰি অভিযান্ত্ৰিক মহাবিদ্যালয় খেলপথাৰলৈ এক ৰেলীৰ আয়োজন কৰাৰ কথা জনাই যুৱ প্ৰজন্মৰ হাৰ্টথ্ৰৱ জুবিন গাৰ্গে । সকলোকে ৰেলীত অংশগ্ৰহণ কৰিবলৈও আহ্বান জনাই তেওঁ ৷
