চিটাৰা ডেস্ক, ২১ নৱেম্বৰ: অভিনেতা অক্ষয় কুমাৰে ৰুজু কৰা মানহানিৰ গোচৰ সন্দৰ্ভত প্ৰতিক্ৰিয়া প্ৰকাশ কৰিছে ইউটিউবাৰ ৰছিদ ছিদ্দিকীয়ে। ৰছিদে কয় যে, তেওঁ নিজৰ ইউ টিউব চেনেলত প্ৰচাৰ কৰা ভিডিঅ'টোত অপমানজনক কথা একো নাছিল আৰু অক্ষয়ে দাবী কৰা ৫০০ কোটি টকাৰ ক্ষতিপূৰণ দিবলৈ অমান্তি হয়। অভিনেতা সুশান্ত সিং ৰাজপুতৰ মৃত্যুৰ ঘটনা সন্দৰ্ভত প্ৰস্তুত কৰা এক ভিডিঅ'ত ছুপাৰষ্টাৰগৰাকীৰ বিৰুদ্ধে ৰছিদ ছিদ্দিকীয়ে মিছা আৰু ভিত্তিহীন অভিযোগ উত্থাপন কৰাৰ বাবে অক্ষয়ে ৫০০ কোটি টকাৰ ক্ষতিপূৰণ বিচাৰি যোৱা ১৭ নৱেম্বৰত মানহানিৰ গোচৰ ৰুজু কৰে আৰু ছিদ্দিকীলৈ জাননী জাৰি কৰে ।
ইয়াৰ পিছত ছিদ্দিকীয়ে এই জাননী উভতাই ল'বলৈ অক্ষয় কুমাৰক অনুৰোধ জনাইছিল যদিও কোনো ফল নধৰিলে । সম্প্ৰতি আইনী যুঁজ আগবঢ়াই নিয়াৰ সিদ্ধান্ত লৈছে ইউ টিউবাৰগৰাকীয়ে। অক্ষয় কুমাৰে আইনী ফাৰ্ম আই চি লিগেলৰ জৰিয়তে প্ৰেৰণ কৰা জাননীত উল্লেখ কৰা হৈছে যে, ছিদ্দিকীয়ে তেওঁৰ ইউ টিউব চেনেল এফএফ নিউজত বহু সন্মান হানি হোৱা, অপমানজনক আৰু অৱমাননাসূচক ভিডিঅ' প্ৰচাৰ কৰিছে। ছিদ্দিকীয়ে শুকুৰবাৰে নিজৰ অধিবক্তা জে পি জয়ছৱালৰ জৰিয়তে প্ৰেৰণ কৰা উত্তৰত কয় যে, অক্ষয় কুমাৰে তেওঁৰ বিৰুদ্ধে উত্থাপন কৰা অভিযোগ মিছা, ঘৃণনীয়, দমনমূলক আৰু ছিদ্দিকীক অশান্তি দিবলৈ কৰা হৈছে । ইয়াকো কোৱা হৈছে যে, সুশান্তৰ মৃত্যুৰ পিছত ছিদ্দিকীসহ বহু ফ্ৰিলেন্স সাংবাদিকে এই বাতৰি প্ৰকাশ কৰিছিল, কিয়নো বহু প্ৰভাৱশালী লোক সুশান্তৰ মৃত্যুৰে জড়িত হৈ আছিল আৰু আগশাৰীৰ সংবাদ মাধ্যমে সত্য বাতৰি প্ৰকাশ কৰা নাছিল ।