অক্ষয়ৰ পাছত এইবাৰ কৰ'ণাত আক্ৰান্ত 'ৰামসেতু'ৰ ৪৫ গৰাকী কলা-কুশলী

কৰ'ণাত আক্ৰান্ত বলীউড ছুপাৰষ্টাৰ অক্ষয় কুমাৰক সম্প্ৰতি মুম্বাইৰ এক চিকিৎসালয়ত ভৰ্তি কৰোৱা হৈছে । অভিনেতা গৰাকীৰ পিছতে তেওঁৰ আহিবলগীয়া ছবি 'ৰামসেতু'ৰ ৪৫ গৰাকী কলা-কুশলী কৰ'ণাত আক্ৰান্ত হয় ।

চিটাৰা ডেস্ক, ৫ এপ্ৰিল: বলীউড ছুপাৰষ্টাৰ অক্ষয় কুমাৰ কৰ'ণাত আক্ৰান্ত হোৱাৰ পূৰ্বে তেওঁৰ আহিবলগীয়া ছবি 'ৰামসেতু'ৰ দৃশ্যগ্ৰহণত ব্যস্ত আছিল । শেহতীয়াকৈ ছবিখনৰ ৪৫ গৰাকী কলা-কুশলীও কৰ'ণাত আক্ৰান্ত হোৱাৰ কথা পোহৰলৈ আহিছে । একচনধৰ্মী ছবি 'ৰামসেতু'ৰ দৃশ্যগ্ৰহণৰ পাঁচ দিন পাচতে কৰ'ণাত আক্ৰান্ত হয় অক্ষয় কুমাৰ ।

অহা ৫ এপ্ৰিলৰ পৰা মাধ দ্বীপত প্ৰায় ১০০ জন কলা-কুশলীয়ে ছবিখনৰ দৃশ্যগ্ৰহণৰ কাম আৰম্ভ কৰিবলৈ সাজু হৈছিল বুলি জানিব পৰা গৈছে । অক্ষয় কুমাৰৰ পাচত যেতিয়া প্ৰতিগৰাকী কলা-কুশলীৰ বাবে কৰ'ণা পৰীক্ষা বাধ্যতামূলক কৰা হয় তেতিয়া ৪০ গৰাকী কলা-কুশলীৰ দেহত ক’ভিড ১৯ ৰ অৱস্থিতি ধৰা পৰে ।

সম্প্ৰতি আক্ৰান্ত আটাইকেইগৰাকী লোক হোম কোৱাৰেন্টাইনত আছে বুলি জানিব পৰা গৈছে । আক্ৰান্ত ৪০ গৰাকীৰ ভিতৰত আছে কনিষ্ঠ শিল্পী, অক্ষয়ৰ ৰূপ সজ্জা কৰ্মী আৰু সহায়ক সকল । সম্প্ৰতি ছবিখনৰ দৃশ্যগ্ৰহণৰ কাম অনিৰ্দিষ্ট কাললৈ বন্ধ ৰখা হৈছে ।

ইফালে, কৰ'ণাত আক্ৰান্ত বলীউড ছুপাৰষ্টাৰ অক্ষয় কুমাৰক সম্প্ৰতি মুম্বাইৰ এক চিকিৎসালয়ত ভৰ্তি কৰোৱা হৈছে । তেওঁ কৰ'ণাত আক্ৰান্তৰ কথা দেওবাৰে টুইটযোগে প্ৰকাশ কৰে । যোৱা ৩০ মাৰ্চত অক্ষয়ৰ দেহত ক’ভিড 19 ৰ অৱস্থিতি ধৰা পৰিছিল ।

লগতে পঢ়ক: বিশিষ্ট অভিনেত্ৰী শশীকলা ওম প্ৰকাশ চাইগেলৰ দেহাৱসান