ইণ্টাৰনেশ্যনেল ডেস্ক,২ ডিচেম্বৰ : এসপ্তাহ পূৰ্বে উত্তৰ কোৰিয়াই গুপ্তচৰ উপগ্ৰহ কক্ষপথত স্থাপন কৰা বুলি দাবী কৰিছিল । তাৰ পাছতে দক্ষিণ কোৰিয়াইও সামৰিক গুপ্তচৰ উপগ্ৰহ উৎক্ষেপণৰ দাবী কৰিছে । দক্ষিণ কোৰিয়াই শুকুৰবাৰে প্ৰথমবাৰৰ বাবে সামৰিক গুপ্তচৰ উপগ্ৰহ উৎক্ষেপণ কৰে । যাক লৈ দুয়োখন দেশৰ মাজত উত্তেজনাও বৃদ্ধি পাইছে । দক্ষিণ কোৰিয়াই স্পেচএক্সৰ ফালকন ৯ ৰকেট ব্যৱহাৰ কৰি কেলিফৰ্ণিয়াৰ ভাণ্ডেনবাৰ্গ মহাকাশ ঘাটিৰ পৰা উপগ্ৰহটো উৎক্ষেপণ কৰিছে বুলি জানিব পৰা গৈছে ।
দক্ষিণ কোৰিয়াই স্পেচএক্সৰ সৈতে এই সন্দৰ্ভত চুক্তি কৰিছিল । সেই চুক্তিৰ অধীনত ২০২৫ চনৰ ভিতৰত মহাকাশলৈ ৫ টা গুপ্তচৰ উপগ্ৰহৰ প্ৰেৰণ কৰাৰ পৰিকল্পনা কৰা হৈছে । তাৰ ভিতৰত এইটো প্ৰথম উপগ্ৰহ । উৎক্ষেপণৰ পৰিকল্পনা এই সপ্তাহৰ আৰম্ভণিতে নিৰ্ধাৰণ কৰা হৈছিল কিন্তু বতৰৰ পৰিস্থিতিৰ বাবে পিছুৱাই দিয়া হৈছিল । উল্লেখ্য যে মহাকাশত দক্ষিণ কোৰিয়াৰ নিজা কোনো সামৰিক গুপ্তচৰ উপগ্ৰহ নাই আৰু উত্তৰ কোৰিয়াৰ গতিবিধি নিৰীক্ষণ কৰিবলৈ আংশিকভাৱে আমেৰিকাৰ গুপ্তচৰ উপগ্ৰহ ব্যৱহাৰ কৰি আহিছে দক্ষিণ কোৰিয়াই ।
দক্ষিণ কোৰিয়াৰ এই গুপ্তচৰ উপগ্ৰহই উত্তৰ কোৰিয়াৰ বিৰুদ্ধে দেশখনৰ প্ৰতিৰক্ষা যথেষ্ট উন্নত কৰিব বুলি আশা কৰা হৈছে । এই বছৰৰ আৰম্ভণিতে দুটা উপগ্ৰহ উৎক্ষেপণ বিফল হোৱাৰ পাছত উত্তৰ কোৰিয়াই শেহতীয়াকৈ কৈছিল যে তেওঁলোকে যোৱা সপ্তাহত মালিগয়ং-১ গুপ্তচৰ উপগ্ৰহটো সফলতাৰে কক্ষপথত স্থাপন কৰিছে । ইফালে দক্ষিণ কোৰিয়াইও নিশ্চিত কৰিছে যে উপগ্ৰহটো কক্ষপথত প্ৰৱেশ কৰিছে । কিন্তু বিষয়াসকলে কোৱা মতে ই সঠিকভাৱে কাম কৰি আছে নে নাই সেয়া পৰীক্ষা কৰিবলৈ তেওঁলোকক অধিক সময়ৰ প্ৰয়োজন হ'ব ।