নিউজ ডেস্ক, 31 জুলাই : আফগানিস্তানৰ সীমান্তৱৰ্তী খাইবাৰ পখতুনখোৱা প্ৰদেশৰ এখন অশান্ত জনজাতীয় জিলাত সংঘটিত হোৱা আত্মঘাতী বোমা বিস্ফোৰণত কেইবাজনো লোক নিহত হোৱাৰ লগতে আহত হৈছে ডেৰ শতাধিক লোক ৷ দেওবাৰে এটা কট্টৰ ইছলামিক দলৰ এক সমাৱেশত আত্মঘাতী বোমাৰুৰ দ্বাৰা সংঘটিত কৰা এই শক্তিশালী বিস্ফোৰণত কমেও ৪২ জন লোক নিহত হোৱাৰ লগতে প্ৰায় ১৫০ জন লোক আহত হয় ৷
বিয়লি ৪ বজাত বজৌৰ জনজাতি জিলাৰ খাৰত অনুষ্ঠিত জমিয়ত উলেমা-ই-ইছলাম-ফজলৰ শ্ৰমিক অধিৱেশনত সংঘটিত হয় এই বিস্ফোৰণ ৷ এই বিস্ফোৰণত কমেও ৪০ জন লোক নিহত হোৱাৰ লগতে প্ৰায় ১৫০ জন আহত হোৱা বুলি চিকিৎসালয়ৰ সূত্ৰই প্ৰকাশ কৰিছে ৷ বজৌৰ অঞ্চলৰ জিলা জৰুৰীকালীন বিষয়া সাদ খানে মৃতকৰ সংখ্যা নিশ্চিত কৰিছে ৷ তেওঁ কয় যে, এই বিস্ফোৰণত সংগঠনটোৰ স্থানীয় নেতা মৌলানা জিয়াউল্লাহ জানো নিহত হৈছে ৷
উদ্ধাৰ কৰ্মীয়ে কয় যে, তেওঁলোকে হতাহতৰ সংখ্যা বৃদ্ধি হোৱাৰ আশংকা কৰিছিল ৷ দূৰদৰ্শনৰ ফুটেজত দেখা গৈছিল যে, বিস্ফোৰণৰ পিছত আহতসকলক চিকিৎসালয়লৈ স্থানান্তৰ কৰিবলৈ এম্বুলেন্স অহাৰ সময়ত ঘটনাস্থলীত আতংকিত লোকসকল একত্ৰিত হৈছিল ৷ বিস্ফোৰণটো সংঘটিত হোৱাৰ সময়ত ৫০০ তকৈও অধিক লোক সমাৱেশত উপস্থিত আছিল ৷ আৰক্ষীৰ মালাকান্দ ৰেঞ্জৰ ডিআইজি নাছিৰ মেহমুদ চাট্টিয়ে কয় যে প্ৰাৰম্ভিক অনুসন্ধানত এইটো এটা আত্মঘাতী বিস্ফোৰণ বুলি প্ৰকাশ পাইছে ৷ অৱশ্যে, বিস্ফোৰণৰ প্ৰকৃতি নিৰ্ধাৰণ কৰিবলৈ প্ৰমাণ সংগ্ৰহ কৰা হৈছে ৷ অঞ্চলটো বন্ধ কৰি তালাচী অভিযান আৰম্ভ কৰা হৈছে বুলি তেওঁ কয় ৷
বৰ্তমানলৈকে এই আক্ৰমণৰ দায়িত্ব কোনো গোটে স্বীকাৰ কৰা নাই ৷ প্ৰধানমন্ত্ৰী শ্বেহবাজ শ্বৰীফে ঘটনাক তীব্ৰ গৰিহণা দিছে ৷ তেওঁ কয় যে সন্ত্ৰাসবাদীয়ে ইছলাম, পবিত্ৰ কোৰাণ আৰু পাকিস্তানৰ সমৰ্থন পোষকতা কৰাসকলক লক্ষ্য কৰি লৈছিল ৷ প্ৰধানমন্ত্ৰীৰ কাৰ্যালয়ে প্ৰকাশ কৰা এক বিবৃতিত সন্ত্ৰাসবাদী পাকিস্তানৰ শত্ৰু আৰু তেওঁলোকক নিৰ্মূল কৰা হ’ব বুলি উল্লেখ কৰে ৷ এই কাণ্ডৰ সৈতে জড়িতসকলক কঠোৰ শাস্তি প্ৰদান কৰা হ’ব বুলিও তেওঁ কয় ৷
লগতে প্ৰধানমন্ত্ৰীজনে মন্ত্ৰী ৰানা ছানাউল্লাহ আৰু খাইবাৰ পখতুনখোৱা চৰকাৰৰ পৰাও এই ঘটনাৰ প্ৰতিবেদন বিচাৰিছে ৷ ৰাষ্ট্ৰপতি আৰিফ আলভিয়ে মৃতকৰ বিদেহী আত্মাৰ চিৰশান্তিৰ বাবে প্ৰাৰ্থনা কৰাৰ লগতে শোকসন্তপ্ত পৰিয়ালবৰ্গৰ প্ৰতি সহানুভূতি প্ৰকাশ কৰে ৷ লগতে আহতসকলৰ আশু আৰোগ্য কামনা কৰাৰ লগতে তেওঁলোকক সময়মতে চিকিৎসা সাহাৰ্য প্ৰদান কৰা হ’ব বুলিও ঘোষণা কৰে ৷ স্বৰাজ মন্ত্ৰী ৰাণা ছানাউল্লাই এই আক্ৰমণৰ দোষীক কঠোৰ শস্তি প্ৰদান কৰা হ’ব বুলি ঘোষণা কৰে ৷
এই বিস্ফোৰণক গৰিহণা দি মুখ্যমন্ত্ৰী খানে জিলা প্ৰশাসনৰ পৰা প্ৰতিবেদন বিচাৰিছে ৷ আৰক্ষীয়ে জনোৱা মতে, আহতসকলক ওচৰৰ চিকিৎসালয়লৈ প্ৰেৰণ কৰা হৈছে ৷ আহত লোকসকলৰ অধিকাংশৰে অৱস্থা সংকটজনক বুলি উল্লেখ কৰা হৈছে ৷ উলেমা-ই-ইছলাম-ফজলৰ নেতা হাফিজ হামদুল্লাই কয় যে তেওঁ আজি অধিৱেশনত উপস্থিত থকাৰ কথা আছিল যদিও কিছু ব্যক্তিগত কাৰণত উপস্থিত থাকিব নোৱাৰিলে ৷ তেওঁ এই বিস্ফোৰণক তীব্ৰ গৰিহণা দি এই ঘটনাৰ আঁৰৰ দুস্কৃতিকাৰীক কয় যে, এয়া জেহাদ নহয় সন্ত্ৰাসবাদহে ৷ এয়া মানৱতাৰ ওপৰত আক্ৰমণ বুলি কয় তেওঁ ৷
লগতে পঢ়ক :Anju Pakistan news: ভাৰতৰ অঞ্জুৰ বিবাহ সম্পৰ্কীয় বাতৰি উৰা বাতৰিহে; স্পষ্ট কৰিলে অঞ্জুৱে
