প্ৰথমবাৰলৈ ৰ'ভাৰ চুপাৰকেমত বন্দী মঙল গ্ৰহৰ বতাহৰ শব্দ

নাছাৰ ৰ'ভাৰে চুপাৰকেমৰ সহায়ত প্ৰথমবাৰৰ বাবে মঙল গ্ৰহৰ বতাহৰ শব্দ ৰেকৰ্ড কৰে, যাক লেজাৰ প্ৰযুক্তিৰ ব্যৱহাৰেৰে দৃশ্য আৰু শব্দ ধৰিবলৈ ডিজাইন কৰা হৈছিল ।

ইণ্টাৰনেশ্যনেল ডেস্ক,১১ মাৰ্চ:নাছাৰ মাৰ্চ ৰ'ভাৰে পোন প্ৰথমবাৰৰ বাবে প্ৰেৰণ কৰিলে মঙল গ্ৰহৰ বতাহৰ শব্দ । নাছাই লাভ কৰা মঙল গ্ৰহৰ বতাহৰ (মাৰ্চীয়ান বতাহ) অডিঅ' ৰেকৰ্ডিং বন্দী হৈছে চুপাৰকেমত । চুপাৰকেমে টুলুজৰ ফৰাচী মহাকাশ সংস্থাৰ অপাৰেচন চেণ্টাৰলৈ অডিঅ' ডাটা প্ৰেৰণ কৰিছিল, যিটো আছিল আন এটা গ্ৰহত লেজাৰ জাপৰ প্ৰথম অডিঅ' । চুপাৰকেমৰ মুখ্য অনুসন্ধানকাৰী বিষয়া ৰজাৰ উইঞ্চে এক বিবৃতিযোগে প্ৰকাশ কৰা মতে চুপাৰকেমে মঙল গ্ৰহত ইমান সুন্দৰকৈ কাম কৰা দেখিবলৈ পোৱাটো অতি আচৰিত । তেওঁলোকে আঠ বছৰ পূৰ্বে ইয়াৰ সপোন দেখিছিল । অৱতৰণৰ মাত্ৰ ১৮ ঘণ্টাৰ ভিতৰতে ৰ'ভাৰ ডেকে প্ৰথম ফাইলত মঙল গ্ৰহৰ অজ্ঞান শব্দবোৰ ধৰি লৈছিল ।

দ্বিতীয় ফাইলৰ ২০ ছেকেণ্ডৰ ৰেকৰ্ডিঙত বতাহৰ শব্দবোৰ আৰু বেছি স্পষ্ট আছিল । চুপাৰকেমৰ তৃতীয়টো ফাইলত লেজাৰে ১০ ফুট দূৰত্বৰ এটা শিলত ৩০ বাৰকৈ আঘাত কৰাৰ শব্দ ধৰা পৰিছিল । ইফালে পৃথিৱীৰ বাহিৰে আন গ্ৰহত প্ৰথমবাৰলৈ চুপাৰকেমে ৰমন স্পেকট্ৰ'স্কপি ব্যৱহাৰ কৰিছে । পেৰিছস্থিত চেন্টাৰ নেচনেল ডি'ইটিডছ স্পেচিয়েলছৰ গৱেষণা পৰিচালক অ'লিভাৰ বেইচেকে জনোৱা মতে সাম্ভাব্য জৈৱিক আৰু খনিজ পদাৰ্থ চিনাক্তকৰণত ৰমণ স্পেকট্ৰ'স্কপি প্ৰযুক্তিয়ে বিশেষ ভূমিকা গ্ৰহণ কৰিব ।

চুপাৰকেম নিউ মেক্সিক'ৰ লছ এলামোছ নেচনেল লেব’ৰেটৰি আৰু চিএনইএছৰ অধীনত ফৰাচী গৱেষণা পৰীক্ষাগাৰৰ এক সংযোজকৰ দ্বাৰা যৌথভাৱে নিৰ্মাণ কৰা হৈছিল । নাছা কৰ্তৃপক্ষই জনোৱা মতে চুপাৰকেমে ৰ'ভাৰৰ চকু আৰু কাণৰ দৰে কাম কৰে । লেজাৰবোৰে কিহত আঘাত কৰিছে সেয়া চাবলৈ আৰু শব্দবোৰ শুনি সেয়া প্ৰকৃততে কি তাক বিশ্লেষণ কৰাত সহায় কৰে ।

লগতে পঢ়ক:ইণ্ডোনেছিয়াৰ বাছ দুৰ্ঘটনাঃ উদ্ধাৰ অভিযান অব্য়াহত