চিটাৰা ডেস্ক, 5 ছেপ্টেম্বৰ: শেহতীয়াকৈ মুক্তি লাভ কৰিছে দক্ষিণৰ ছুপাৰষ্টাৰ বিজয় দেৱেৰাকোণ্ডাৰ অভিনীত ছবি ‘কুশী’ ৷ ছবিখনে বক্স অফিচত দেখুৱাইছে ভাল ফলাফল, লগতে অনুৰাগীয়েও ভাল পাইছে ছবিখন । এতিয়া ছবিখনৰ সফলতাত অভিনেতা বিজয় দেৱৰাকোণ্ডাই লৈছে এক ডাঙৰ সিদ্ধান্ত ৷
ছবিখনৰ পৰা লাভ কৰা পাৰিশ্ৰমিকৰ পৰা ১০০ টা দুখীয়া পৰিয়ালক ১ কোটি টকা অনুদান আগবঢ়োৱাৰ সিদ্ধান্ত লৈছে অভিনেতাগৰাকীয়ে । বিজয় দেৱেৰাকোণ্ডাই ঘোষণা কৰে যে অনুৰাগীৰ সৈতে এই সুখ ভাগ কৰিবলৈ তেওঁ ‘কুশী’ৰ পৰা পোৱা পাৰিশ্ৰমিকৰ পৰা ১ কোটি টকা ব্যয় কৰি ১০০টা পৰিয়ালক সহায় কৰিব। এইখিনিতে উল্লেখ কৰিব লাগিব যে মাত্ৰ তিনিদিনতে ‘কুশী’ ছবিখনে ৭০ কোটিৰো অধিক টকা উপাৰ্জন কৰিছে উপাৰ্জন কৰিছে বক্স অফিচত ।
বিজয় দেৱেৰাকোণ্ডা আৰু সামান্থা ৰুথ প্ৰভু তেওঁলোকৰ সদ্য মুক্তি পোৱা ছবি ‘কুশী’ৰ সফলতাত অতিকৈয়ে সুখী ৷ শেহতীয়াকৈ হায়দৰাবাদৰ ছবিগৃহ পৰিদৰ্শন কৰাৰ পিচত বিজয়ে বিশাখাপট্টনমৰ এক প্ৰচাৰমূলক অনুষ্ঠানত অংশগ্ৰহণ কৰে । এই অনুষ্ঠানতে খোদ বিজয়ে ঘোষণা কৰে যে তেওঁৰ পাৰিশ্ৰমিকৰ পৰা ১ কোটি টকা ১০০টা আৰ্তজনৰ পৰিয়াললৈ আগবঢ়াব । তেওঁ কয় যে তেওঁ নিজৰ অনুৰাগীৰ সৈতে সুখ শ্বেয়াৰ কৰিব খুজে আৰু সেইবাবেই তেওঁ ১০০টা পৰিয়ালক ১ কোটি টকা দান দিব বিচাৰিছে।
উল্লেখ্য যে শিৱ নিৰ্বাণে পৰিচালনা কৰা ‘কুশী’ ছবিখন ১ ছেপ্টেম্বৰত একাধিক ভাষাত ছবিগৃহত মুক্তি লাভ কৰিছিল আৰু ছবিখনে বক্স অফিচত ব্যতিক্ৰমীভাৱে ভাল প্ৰদৰ্শন কৰিছে । ইফালে ৪ ছেপ্টেম্বৰত বিজয় দেৱেৰাকোণ্ডাই বিশাখাপট্টনমৰ এক প্ৰচাৰমূলক অনুষ্ঠানত অংশ লৈ নিজৰ অনুৰাগীৰ সৈতে মতবিনিময় কৰে ৷