পাঠান নাচাই এন এক্সন হিৰ’ চাবলৈ কোৱা অনুৰাগীক আয়ুষ্মান খুৰানাই দিলে এই উত্তৰ

এন এক্সন হিৰ’ ছবিখনত কৰা অভিনয়ৰ বাবে প্ৰশংসা কৰা অভিনেতা আয়ুষ্মান খুৰানাৰ অনুৰাগীয়ে শ্বাহৰুখৰ পাঠান নাচাবলৈ কৈছে (Ayushmann Khurrana latest news) ৷ তাতেই লাগিল কেণা ৷ এই মন্তব্যৰ পিছত শ্বাহৰুখ অনুৰাগী আয়ুষ্মানে কি ক’লে নিজৰ অনুৰাগী গৰাকীক জানো আহকচোন-

চিটাৰা ডেস্ক, 4 ফেব্ৰুৱাৰী : বৰ্তমান সময়খিনিত ছবিজগতত বেছিকৈ প্ৰচলিত হৈ থকা নামটো হৈছে শ্বাহৰুখ খান ৷ শ্বাহৰুখৰ পাঠানেই এক দীঘলীয়া সময়ৰ বিৰতিত বলীউডৰ উৰ্দ্ধমুখী যাত্ৰাৰ সূচনা কৰিছে বুলি ক’ব পাৰি ৷ কিন্তু তেনে সময়তে যদি কোনোবাই কয় যে পাঠান ছবিখন নেচাব, কেনেকুৱা লাগিব শ্বাহৰুখ অনুৰাগীৰ লগতে অন্য বলীউড তাৰকাসকলৰ যিয়ে পাঠান ছবিখনৰ বাবে বলীউড পুনৰ জী উঠিছে বুলি গণ্য কৰিছে ৷

হয়, ঠিক তেনেকুৱা এটা ঘটনাই এতিয়া ছ’চিয়েল মিডিয়াত দৃষ্টি আকৰ্ষণ কৰিছে সকলোৰে ৷ ক্ষোভত ফাটি পৰিছে শ্বাহৰুখৰ অনুৰাগী সকল ৷ সেই শ্বাহৰুখ অনুৰাগী সকলৰ ভিতৰত আছে বলীউডৰ এজন অন্যতম অভিনেতা আয়ুষ্মান খুৰানা ৷ কিন্তু আচৰিত কথাটো হ’ল যে খোদ আয়ুষ্মানৰ অনুৰাগীয়েই কৰিছে এই মন্তব্য যে, ‘শ্বাহৰুখৰ পাঠান চাবলৈ বাদ দিয়ক’ ৷

দৰাচলতে অনুৰাগী গৰাকীয়ে তুলনাত্মকভাৱে পাঠান নাচাই আয়ুষ্মান অভিনীত এন এক্সন হিৰ’ চাবলৈ কয় সকলোকে ৷ কিন্তু এই টুইটোৰ লগতে সকলোৰে দৃষ্টি আকৰ্ষণ কৰিছে আয়ুষ্মানৰ প্ৰত্যুত্তৰটোৱে ৷ আয়ুষ্মানক প্ৰশংসা কৰিছে যদিও কিন্তু অভিনেতাজনে নিজৰ অনুৰাগীক সোঁৱৰাই দিয়ে যে তেওঁ কিমান ডাঙৰ শ্বাহৰুখ অনুৰাগী ৷

কিং খানৰ এক্সন থ্ৰিলাৰ পাঠান বক্স অফিচত অপ্ৰতিৰোধ্য হৈ থকা অৱস্থাত এজনে ছ’চিয়েল মিডিয়াত ছবিখনক তীব্ৰ সমালোচনা কৰি আয়ুষ্মান খুৰানাৰ ব্যংগমূলক একচন নাটক ‘এন এক্সন হিৰ’ৰ প্ৰশংসা কৰে । যেতিয়া আয়ুষ্মানে পাঠানক হেয়জ্ঞান কৰি তেওঁৰ ছবিখনৰ প্ৰশংসা কৰা অনুৰাগীৰ টুইটটো লক্ষ্য কৰিলে, তেতিয়া তেওঁ ইয়াৰ প্ৰতি প্ৰতিক্ৰিয়া প্ৰকাশ কৰিলে আৰু লগতে এইটোও উল্লেখ কৰিলে যে তেওঁ প্ৰকৃতাৰ্থত এজন SRKian ।

টুইটাৰত মুবিনা কাপাছি নামৰ এজন ব্যৱহাৰকাৰীয়ে লিখিছে, "স্ক্ৰু পাঠান, নেটফ্লিক্সত এক্সন হিৰ’ চাওক ! কাহিনী, সংলাপ, বেকগ্ৰাউণ্ড মিউজিক, ভাৰতীয় নিউজ চেনেলক দেখুওৱা সূক্ষ্ম মধ্যমা আঙুলি আৰু তেওঁলোকৰ মূৰ্খ প্ৰতিবেদন, @ayushmannk has KILLED ! কিন্তু মোৰ প্ৰিয় আছিল অৰ্ণবৰ অনুকৰণ কৰা ল'ৰাজন" ৷

যেতিয়া খুৰানাই এই টুইটটো প্ৰত্যক্ষ কৰে তেতিয়া তেওঁ নম্ৰতাৰে এই প্ৰশংসাৰ উত্তৰ দিয়ে যিয়ে এতিয়া তেওঁক পুনৰ ষ্টাৰ কৰি তুলিছে ৷ টুইটটোৰ প্ৰতিক্ৰিয়া প্ৰকাশ কৰি নেশ্যনেল বঁটা বিজয়ী অভিনেতাগৰাকীয়ে লিখিছে, "এন এক্সন হিৰ’ক ভাল পোৱাৰ বাবে ধন্যবাদ । কিন্তু প্ৰথম বাক্যটো এৰাই চলিব পাৰিলোঁহেঁতেন কিয়নো মই এজন শ্বাহৰুখ অনুৰাগী!" (Ayushmann Khurrana twitter) ৷

আয়ুষ্মানে এইদৰে প্ৰতিক্ৰিয়া প্ৰকাশ কৰাৰ কিছু সময়ৰ পিছতে অনুৰাগীসকল অভিনেতাগৰাকীৰ প্ৰশংসাত পঞ্চমুখ হৈ পৰে । এজন ব্যৱহাৰকাৰীয়ে লিখিছে, "আপোনাৰ বিনয়ৰ বাবে আপোনাক ভাল পাওঁ ভাই" । আন এজন ব্যৱহাৰকাৰীয়ে মন্তব্য কৰিছে, "এক হি তোহ দিল হে কিটনি বাৰ জীতোগে @ayushmannk" ৷ এজন অনুৰাগীয়ে লিখিছে, "ভাল কাম কৰিলা আয়ুষ্মান ! আপুনিও আমাৰ দৰেই যিয়ে শ্বাহক নিঃচৰ্তভাৱে ভাল পায়" ৷

আয়ুষ্মানে সদায় কৈ আহিছে যে তেওঁ শ্বাহৰুখ খানৰ প্ৰবল অনুৰাগী । আনকি এন এক্সন হিৰ’ মুক্তি পোৱাৰ পূৰ্বেও আয়ুষ্মানে এছ আৰ কেৰ মুম্বাইৰ বাসগৃহ মন্নত পৰিদৰ্শন কৰিছিল । আন যিকোনো অনুৰাগীৰ দৰেই আয়ুষ্মানেও মন্নত পাৰ হৈ যোৱাৰ সময়ত এখন ফটো তুলি ছ’চিয়েল মিডিয়াত পোষ্ট কৰিছিল ।

আমোদজনক কথাটো হ’ল পাঠান আৰু এন এক্সন হিৰ’ৰ মাজত এটা মিল আছে । দুয়োখন ছবিৰেই ক্ৰমে শ্বাহৰুখ আৰু আয়ুষ্মানে এক্সন ধাৰাত আত্মপ্ৰকাশ কৰে ।

লগতে পঢ়ক :Pathaan In Pakistan: নিষেধাজ্ঞাৰ পিছত পাকিস্তানত 900 টকাত বিক্ৰী হৈছে পাঠানৰ টিকট