চিটাৰা ডেস্ক, 1 ডিচেম্বৰ: ২০২৩ চনৰ আটাইতকৈ প্ৰত্যাশিত ছবিসমূহৰ ভিতৰত অন্যতম বিকি কৌশল অভিনীত ছবি ‘ছেম বাহাদুৰ’ । এই ছবিখন আজি অৰ্থাৎ ১ ডিচেম্বৰত চিনেমাগৃহত মুক্তি লাভ কৰিছে । ইফালে আজি মুক্তি লাভ কৰিছে ৰণবীৰ কাপুৰৰ ‘এনিমেল’ ছবিখনো ৷ এতিয়া বিকি কৌশলৰ ছবিখনৰ সৈতে ৰণবীৰ কাপুৰৰ ‘এনিমেল’ৰ সংঘৰ্ষ হৈছে । ‘এনিমেল’ক লৈ যথেষ্ট চৰ্চা হৈছে যদিও ইয়াৰ প্ৰভাৱ ‘ছেম বাহাদুৰ’ত একেবাৰেই পৰা নাই ৷ ছবিখনৰ মুকলি ভাল উপাৰ্জনৰেই হৈছে । কেৱল ইমানেই নহয়, এই ছবিখনো বিকি কৌশলৰ কেৰিয়াৰৰ তৃতীয় সৰ্বোচ্চ অ’পেনাৰ হিচাপে পৰিগণিত হৈছে । জানো আহক ‘ছেম বাহাদুৰ’ মুক্তিৰ প্ৰথম দিনাই কিমান উপাৰ্জন কৰিছে ৷
কিমান কোটি টকাৰে মুকলি হ’ল ‘ছেম বাহাদুৰ’ ?
‘ছেম বাহাদুৰ’ দেশৰ প্ৰথমজন ফিল্ড মাৰ্শ্বাল ছেম মানেকশ্ব’ৰ বায়’পিক । মেঘনা গুলজাৰৰ পৰিচালনাত নিৰ্মিত এই যুদ্ধ নাটক ছবিখনত মুখ্য চৰিত্ৰত অভিনয় কৰিছে বিকি কৌশলে । ছবিখনৰ ট্ৰেইলাৰ মুক্তি পোৱাৰ পিচৰে পৰা অনুৰাগীয়ে আগ্ৰহেৰে অপেক্ষা কৰি আছিল ‘ছেম বাহাদুৰ’ৰ মুক্তিৰ বাবে । এতিয়া ছবিগৃহত এই ছবিখনে চুই গৈছে দৰ্শকৰ হৃদয় । ছবিখন আৰু বিকি কৌশলৰ অভিনয়ৰ প্ৰশংসাত পঞ্চমুখ হৈছে দৰ্শক । ইয়াৰ লগে লগে বিকিৰ ছবিখনৰ আৰম্ভণিও অতি ভাল উপাৰ্জনেৰে হৈছে । এতিয়া ‘ছেম বাহাদুৰ’ৰ উপাৰ্জনৰ প্ৰাৰম্ভিক তথ্যও পোহৰলৈ আহিছে ।
- Sacknilk ৰ আৰম্ভণিৰ ট্ৰেণ্ড ৰিপৰ্ট অনুসৰি মুক্তিৰ প্ৰথম দিনাই ‘ছেম বাহাদুৰ’এ ৬ কোটি টকা উপাৰ্জন কৰিছে ।
- যদিও এইবোৰ প্ৰাৰম্ভিক পৰিসংখ্যা হে কেৱল, আনুষ্ঠানিক সংখ্যা অহাৰ পিচত সামান্য পৰিৱৰ্তন হ’ব পাৰে ।
বিকি কৌশলৰ কেৰিয়াৰৰ তৃতীয় সৰ্বোচ্চ অ’পেনাৰ হিচাপে পৰিগণিত হৈছে ‘ছেম বাহাদুৰ’
'ছেম বাহাদুৰ'এ দৰ্শকৰ পৰা অতি উত্তম সঁহাৰি লাভ কৰিছে । বিকি কৌশলৰ এই ছবিখনে ৬ কোটি টকাৰ ওপেনিং লাভ কৰিছে যিটো আছিল অতি উত্তম । ইয়াৰ লগে লগে এই ছবিখন বিকি কৌশলৰ কেৰিয়াৰৰ তৃতীয় সৰ্বোচ্চ অ’পেনাৰ হিচাপে পৰিগণিত হৈছে । ইয়াৰ পূৰ্বে অভিনেতাগৰাকীৰ ‘উৰি’ আৰু ‘ৰাজী’ ছবিয়ে প্ৰথম দিনাই সৰ্বাধিক সংগ্ৰহ লাভ কৰিছিল ।