চিটাৰা ডেস্ক, ৮ জানুৱাৰী:মুক্তি পালে মহেশ বাবু অভিনীত আটাইতকৈ প্ৰত্যাশিত ছবি "গুন্টুৰ কৰম"ৰ জোৰদাৰ ট্ৰেইলাৰ । ট্ৰেইলাৰটোত ছুপাৰষ্টাৰ মহেশ বাবুৰ জোৰদাৰ একশ্যন, ডেশ্যিং লুকে অনুৰাগীৰ হৃদয় জয় কৰিছে । মহেশ বাবুৰ এই ছবিখনৰ বাবে অনুৰাগীয়ে বহুদিন ধৰি অপেক্ষা কৰি আছিল । আচলতে মহেশ বাবুক শেষবাৰৰ বাবে ২০২২ চনত মুক্তি পোৱা তেওঁৰ ছবি ‘সৰকাৰু ৱাৰী পট্টা’ত দেখা গৈছিল । কিন্তু ২০২৩ চনত অভিনেতাগৰাকীৰ কোনো ছবি পৰ্দাত মুক্তি পোৱা নাছিল । এনে পৰিস্থিতিত অনুৰাগীয়ে আগ্ৰহেৰে অপেক্ষা কৰি আছিল ‘গুন্টুৰ কৰম’ৰ বাবে ।
'গুন্টুৰ কৰম'ৰ ট্ৰেইলাৰ ওলোৱাৰ পিচতে ছ’চিয়েল মিডিয়াত ব্যাপক চৰ্চা লাভ কৰে । মহেশ বাবুৱে ছবিখনত ৰমন ৰেড্ডীৰ চৰিত্ৰত অভিনয় কৰিছে । ডাঙৰ পুত্ৰ ৰমনক ত্যাগ কৰা এগৰাকী মাতৃৰ চৰিত্ৰত অভিনয় কৰিব ৰম্যা কৃষ্ণনে । মহেশ বাবু আৰু শ্ৰীলীলাৰ ৰোমান্টিক কেমিষ্ট্ৰী ছবিখনত দেখা যাব ।
ত্ৰিবিক্ৰম শ্ৰীনিবাসৰ পৰিচালনাত নিৰ্মিত ‘গুন্টুৰ কৰম’ ছবিখনত মহেশ বাবুৰ উপৰিও শ্ৰীলীলা আৰু মীনাক্ষী চৌধুৰীয়েও গুৰুত্বপূৰ্ণ চৰিত্ৰত অভিনয় কৰা দেখা যাব । উল্লেখযোগ্য যে ছবিখনৰ আৰম্ভণিতে পূজা হেগড়েক শ্ৰীলীলাৰ চৰিত্ৰৰ বাবে নিৰ্বাচিত কৰা হৈছিল । কিন্তু কিবা কাৰণত পূজাই এই প্ৰজেক্টৰ পৰা আঁতৰি আহিবলগীয়া হৈছিল । ইয়াৰ পিচত চিত্ৰনাট্যত ডাঙৰ পৰিৱৰ্তন কৰা হৈছিল আৰু দৃশ্যবোৰ পুনৰ শ্বুটিং কৰিবলগীয়া হৈছিল ।