ঠিকাদাৰৰ হেমাহিৰ বাবে জলা-কলা ৰাইজৰ

কলিয়াবৰত ঠিকাদাৰৰ হেমাহিৰ বিগত আঠ মাহৰ পাছতো নিৰ্মাণ সম্পূৰ্ণ হৈ নুঠিল দলঙৰ ৷ যাৰ বাবে এতিয়া দুৰ্ভোগ ভুগিছে সোণাজুৰিকে ধৰি বিস্তৃত অঞ্চলৰ ৰাইজে ৷

কলিয়াবৰ, 23 জুলাই : কলিয়াবৰ মহকুমাৰ ৩৭ নং ৰাষ্ট্ৰীয় ঘাইপথৰ পৰা কাৰ্বি আংলং সংযোগী গড়কাপ্তানী পথচোৱাৰ ওপৰত থকা দলংখনক লৈ এতিয়া হাহাকাৰ অৱস্থাৰ সৃষ্টি হৈছে ৷ কাৰণ বিগত আঠ মাহে দলংখনৰ নিৰ্মাণৰ কাম ঠিকাদাৰে সম্পূৰ্ণ নকৰিলে বুলি অভিযোগ কৰিছে ৰাইজে ৷ সোনাজুৰিত থকা এই দলংখন নিৰ্মাণৰ বাবে ঠিকাদাৰে লাভ কৰিছিল কেইবালাখ টকা।

উল্লেখ্য যে, কোনো কাৰণত মনোমালিন্য হৈ দলং খনৰ নিৰ্মাণকাৰ্য আধাতে সামৰিলে বিষয়া-কৰ্মচাৰীয়ে। দলঙখনৰ নিৰ্মাণকাৰ্য আধাতে সামৰি পলায়ন কৰাৰ বাবেই জলা-কলা খাবলগীয়া হৈছে অঞ্চলবাসীয়ে । 2020 বৰ্ষৰ ডিচেম্বৰত মাহতে আৰম্ভ হৈছিল দলংখনৰ পুনৰ নিৰ্মাণৰ কাম । পথচোৱাৰ ওপৰত থকা পুৰণি পকী দলঙখন ভাঙি নতুন দলং নিৰ্মাণৰ কাম হাতত লৈছিল জনৈক ভৌমিক উপাধিৰ এজন ঠিকাদাৰে । কিন্তু আজিকোপটি দলঙখন নিৰ্মাণৰ কাম সম্পূৰ্ণ কৰিব নোৱাৰিলে।

নতুন পকী দলঙখন নিৰ্মাণৰ বাবে পুৰণি দলংখন ভাঙি দিছিল যদিও ঠিকাদাৰ পক্ষই যাতায়তৰ বাবে এটা উপ পথৰ ব্যৱস্থাও কৰি নিদিয়াৰ অভিযোগ তুলিছে ৰাইজে । অঞ্চলবাসীয়ে গাঠিৰ ধন ভাঙি দলঙখনৰ কাষেদি উপ পথ এটা নিৰ্মাণ কৰিছে যদিও এজাক বৰষুণ আহিলেই পথচোৱাত যাতায়াতৰ বাবে অনুপযোগী হৈ পৰে ৷

উপ পথটোৰে সৰু-বৰ বাহন অহাতো দূৰৈৰে কথা খোজ কাঢ়ি যাবলৈও উপায়হীন হৈ পৰে বুলি অভিযোগ কৰিছে ৷ উক্ত পথটোত ইতিমধ্যে বহু দুৰ্ঘটনা সংঘটিত হৈছে । অতিশীঘ্ৰে পথছোৱা নিৰ্মাণ কৰি দি হলেও যাতায়াতৰ বাবে উপযুক্ত কৰি দিবলৈ দাবী তুলিছে অঞ্চলবাসীয়ে ।

আনহাতে, উক্ত সমস্যাটোৰ কথা ঠিকাদাৰজনক অৱগত কৰাত উপ পথৰ বাবে কোনো ধৰণৰ চৰকাৰৰ পৰা ধনা আৱন্টন হোৱা নাই বুলি তুলুঙা মন্তব্যহে দিয়ে বুলি ৰাইজে সাংবাদিকৰ আগত অভিযোগ কৰিছে ৷ অতিশীঘ্ৰে দলং খন নিৰ্মাণ কৰি দিয়াৰ লগতে বিভাগীয় কৰ্তৃপক্ষক তদন্ত কৰিবলৈ আহ্বান জনাইছে ৰাইজে ৷

লগতে পঢ়ক-অনলাইনত কেনেকৈ পাব সুৰা ?