কলিযুগৰ শ্ৰৱণ কুমাৰৰ বটদ্ৰৱা ভ্ৰমন : মাতৃৰ সৈতে ল'লে আশীষ

বৰ্তমান সময়ত নিজ সন্তানে পিতৃ - মাতৃৰ দায়িত্ব লোৱাৰ পৰা হাত সাৰিবলৈ চেষ্টা কৰাৰ সময়তে কৰ্নাটকৰ ডি কৃষ্ণ কুমাৰে মাতৃভক্তিৰ অতুলনীয় উদাহৰণ দাঙি ধৰিলে ৷ ৭০ বয়সীয়া বৃদ্ধা মাতৃক স্কুটাৰত উঠাই ভেলুৰ মথৰ পৰা আৰম্ভ কৰি কাশী, বৃন্দাবন কামাখ্যাধামকে আদি কৰি উপস্থিত হ'ল বটদ্ৰৱা থানত ৷

বটদ্ৰৱা, 24 জুন : ৪০ হাজাৰ কিলোমিটাৰ পথ ভ্ৰমন কৰি কলিযুগৰ শ্ৰৱণ কুমাৰ খ্যাত কৰ্নাটকৰ ডি কৃষ্ণ কুমাৰ উপস্থিত হ'ল বটদ্ৰৱা থানত ৷ বৰ্তমান সময়ত সন্তানে নিজ পিতৃ - মাতৃৰ দায়িত্বৰ পৰা হাত সাৰিবলৈ বৃদ্ধাশ্ৰমত থোৱাৰ সময়তে ডি কৃষ্ণ কুমাৰে ৭০ বয়সীয়া বৃদ্ধা মাতৃ সুদৰ্থনাৰ মনোবাঞ্চা পূৰণাৰ্থে উপস্থিত হয় বটদ্ৰৱাত ৷ পিতৃয়ে মৃত্যুৰ পূৰ্বে উপহাৰ দিয়া বাজাজ স্কুটাৰ চলাই প্ৰথমে ভেলুৰ মথৰ পৰা যাত্ৰা আৰম্ভ কৰি কাশী, বৃন্দাবন, জগন্নাথ পুৰী, কন্যাকুমাৰী, দ্বাৰকাকে আদি কৰি অৱশেষত অসমত আহি উপস্থিত হয় ৷

উল্লেখ্য যে, ১৩ বছৰ চাকৰি কৰি বিভিন্ন ঠাই ভ্ৰমন কৰাৰ অন্তত মাতৃ সুদৰ্থনাই ভেলুৰ মঠ দৰ্শনৰ ইচ্ছা প্ৰকাশ কৰাত পু্ত্ৰ কুমাৰে ভেলুৰৰ লগতে সমগ্ৰ দেশৰ মঠ - মন্দিৰ পৰিভ্ৰমন কৰোৱায় ৷ চিৰকুমাৰ ব্ৰত গ্ৰহণ কৰা কুমাৰে আজীৱন মাতৃ সেৱাৰ সংকল্পৰে চাকৰিৰ পৰা অব্যাহতি লৈ এনেদৰে দেশৰ বিভিন্ন ঠাই পৰিভ্ৰমন কৰে ৷ এই সৌভাগ্যশালী মাতৃ গৰাকীয়ে মন্তব্য কৰে যে, স্কুটাৰত বহি ইমানবোৰ স্থান পৰিভ্ৰমন কৰাৰ পাছতো কোনো ধৰণৰ কঁকালৰ বিষ, পিঠিৰ বিষ, ভৰিৰ বিষ অনুভৱ কৰা নাই তেওঁ ৷ বটদ্ৰৱা থানত উপস্থিত হৈ মাতৃ - পুত্ৰই কীৰ্তন ঘৰ, পদশিলা, পটশিলা, হাটিবহা, আকাশী গংগা, শংকৰ শিলিখা বৃক্ষ দৰ্শন কৰি আপ্লুত হৈ পৰে । কৃষ্ণ কুমাৰে জানিবলৈ দিয়ে যে, বটদ্ৰৱা থান দৰ্শন নকৰা হ'লে তেওঁৰ উত্তৰ - পূৱ ভ্ৰমণ সাৰ্থক নহ'ল হেতেন ৷