পুনৰ বানৰ কবলত উত্তৰ-পশ্চিম যোৰহাট

বিগত আঢ়ৈ মাহে বহুতো লোক আছে বান শিবিৰত । বঞ্চিত চৰকাৰী সাহায্যৰ পৰাও । কাণ-সাৰ নাই চৰকাৰৰ ।

যোৰহাট, ২৯ জুলাই : আকৌ বানৰ কবলত পৰিছে বৃহত্তৰ উত্তৰ-পশ্চিম যোৰহাট। ৰাজ্যত অব্যাহত থকা নেৰা-নেপেৰা বৰষুণৰ ফলত আজিৰ পৰা আকৌ ভোগদৈ নদীৰ জলপৃষ্ঠ আকৌ বৃদ্ধি পাইছে যাৰ ফলস্বৰূপে প্লাৱিত হৈছে উত্তৰ পশ্চিম যোৰহাট। ২২ মেৰ পৰা আজিও উদ্ধাৰ হোৱা নাই বৃহত্তৰ অঞ্চলটোৰ বানাক্ৰান্তৰ। চৰকাৰী সাহায্যৰ পৰাও বঞ্চিত হৈ আছে একাংশ ৰাইজ। ইফালে ৰাইজৰ অভিযোগ চৰকাৰী সাহায্য প্ৰদানৰ নামত চৰকাৰী গাঁওবুঢ়াই কৰিছে লেতেৰা ৰাজনীতি। নিজৰ পচন্দৰ মতেহে প্ৰদান কৰি আহিছে সাহায্য। এইদৰে এতিয়া পানীত হাঁহ নচৰা অৱস্থা হৈ পৰিছে উত্তৰ পশ্চিম যোৰহাটৰ ৰাইজৰ। কেৱল এবাৰ বান পৰিস্থিতিৰ বুজ লবলৈ আহা স্থানীয় বিধায়ক ভবেন্দ্ৰ নাথ ভৰালীৰ ওপৰত এতিয়া তীব্ৰ ক্ষোভ প্ৰকাশ কৰিছে অঞ্চলটোৰ ৰাইজে। আনহাতে ভোগদৈৰ ছিগা অংশটো পুনৰ মেৰামতি লগতে বন্ধাৰ ব্যৱস্থা নকৰাৰ বাবে ভোগদৈৰ বাঢ়নী পানী বাৰে বাৰে সোমাই বৃহত্তৰ কৃষিপ্ৰধান অঞ্চলত এতিয়া বিভীষিকাৰ সৃষ্টি কৰিছে। যদি সোমবাৰে আবেলিলৈকে ভোগদৈৰ বাঢ়নী পানীৰ পৰিমাণ হ্ৰাস নহয় তেনেহলে নিশাৰ ভাগত বাঢ়নী পানীয়ে সন্ত্ৰাসৰ সৃষ্টি কৰাৰ সম্ভাৱনা আছে ।