পুৱা 9 বজাৰ শীৰ্ষ দহটা বাতৰি:
কন্যা সন্তানৰ সজাগতাৰ বাবে চৰকাৰে বিভিন্ন পদক্ষেপ গ্ৰহণ কৰিবলগীয়া হৈছে । তাৰ পিছতো একাংশ নিষ্ঠুৰ লোকে কন্যা সন্তান হত্যাৰ দৰে চৰম পথ লোৱা দেখা যায় । কিন্তু অসমৰ এখন ভিতৰুৱা গাঁৱত এগৰাকী কন্যা সন্তানৰ বাবে গৌৰৱ কৰিছে তেওঁৰ পিতৃয়ে । কিয়নো ট্ৰেক্টৰ চলাই নিতৌ কৃষি কৰ্মত কন্যাই সহায় কৰিছে পিতৃক । কেৱল এয়াই নহয় বহুতৰ বাবে আদৰ্শ হৈ পৰিছে দশমমানৰ ছাত্ৰীগৰাকী ।
ক'ভিডৰ বিৰুদ্ধে সন্মুখৰ পৰা যুঁজ দি চিকিৎসক সকলে জনসাধাৰণৰ জীৱন ৰক্ষা কৰি অহাৰ মাজতে ৰাজ্যত ইজনৰ পাছত সিজনকৈ আৰক্ষীৰ জালত পৰিছে ভুৱা চিকিৎসক ৷ এইবাৰ চামগুৰি আৰক্ষী আৰু শালনা আৰক্ষীৰ যুটিয়া অভিযানত জালত পৰিল এজন ভুৱা চিকিৎসক ৷
সম্প্ৰতি ৰাজ্যত কৰ্তৃপক্ষৰ দায়বদ্ধতাহীনতাৰ বাবে বিতৰ্কৰ শীৰ্ষত আছে মাদাৰ অ’ল্ড এজ হোম(Mother Old Age Home) নামৰ বৃদ্ধাশ্ৰমখন ৷ এনে সময়তে, মাদাৰ অ’ল্ড এজ হোম(Mother Old Age Home)ত থকা বৃদ্ধা লোক সকলৰ সম্পূৰ্ণ দায়িত্ব লবলৈ সাজু হৈছে বৰপেটাৰোডৰ “আশ্ৰয়" নামৰ বৃদ্ধাশ্ৰমৰ গৰাকী চিকিৎসক ডাঃ বুদ্ধদেৱ ভট্টাচাৰ্য ৷
পাৰিবাৰিক কন্দলৰ পৰিপ্ৰেক্ষিতেত প্ৰাণ গ'ল সীমান্ত গগৈ নামৰ এজন যুৱকৰ ৷ মৃত সীমান্ত গগৈৰ পিতৃ দিগন্ত গগৈয়ে এই ঘটনা আকস্মিকভাৱে সংঘটিত হোৱা বুলি উল্লেখ কৰি এয়া এক দুৰ্ঘটনা বুলি উল্লেখ কৰিছে ৷
ৰাজ্যৰ ভিন্ন স্থানত চলিছে ভূ-মাফিয়াৰ দপদপনি ৷ ডেৰশ বছৰে ভোগ দখল কৰি থকা লোকৰ ৰায়তি পাট্টা ভুক্ত মাটিত ভূ-মাফিয়াৰ দলৰ লোলুপ দৃষ্টিৰ বাবে হাৰাশাস্তিত ভুগিছে মাটিৰ প্ৰকৃত গৰাকীয়ে ৷
কাকপথাৰ ৰজাগড়ত উত্তপ্ত পৰিস্থিতি ৷ তালাপ সমবায় সমিতিৰ এজেন্টে সুলভ মূল্যৰ চাউল বিতৰণত ব্যাপক দুৰ্নীতি কৰাৰ অভিযোগ কৰি ক্ষোভিত ৰাইজে তীব্ৰ প্ৰতিবাদ সাব্যস্ত কৰে ৷
মুখ্যমন্ত্ৰী ড৹ হিমন্ত বিশ্ব শৰ্মা (CM Himanta Biswa Sarma)ই শুকুৰবাৰে জিলা উপায়ুক্তসকলৰ সৈতে ক’ভিড (Covid 19) সম্পৰ্কত ভিডিঅ’ কনফাৰেন্সিঙ(video conferencing) ৰ জৰিয়তে বৈঠকত মিলিত হ’ব । বৈঠকৰ পাছত পৰিস্থিতি অনুযায়ী সিদ্ধান্ত লোৱা হ'ব । এতিয়ালৈকে ২২০ টা ক’ভিড হটস্পট (Covid Hotspot) চৰকাৰে চিনাক্ত কৰিছে ৷
প্ৰাক্তন মুখ্যমন্ত্ৰী সৰ্বানন্দ সোণোৱালৰ গৃহ চহৰ চাবুৱাত জৰাজীৰ্ণ অৱস্থাত আছে একমাত্ৰ বয়ন শিল্প কেন্দ্ৰটো ৷ ৰাজ্যৰ নিবনুৱা যুৱক-যুৱতী সকলক কাৰিকৰী দিশত আগুৱাই নিয়াৰ কথা কোৱা চৰকাৰ খনৰ নিবনুৱাক সংস্থাপনৰ ক্ষেত্ৰত যেন প্ৰকৃত স্বৰূপ উদঙাই দিছে বয়ন শিল্প কেন্দ্ৰটোৱে ৷
বৃহস্পতিবাৰে টিহু মহাবিদ্যালয় পৰিদৰ্শন কৰে মন্ত্ৰী ৰণজিৎ কুমাৰ দাসে ৷ পৰিদৰ্শন কালতে তেওঁ কয়, কংগ্ৰেছৰ দৰে বিজেপি আদৰ্শবিহীন নহয় ৷ বিজেপি এক দৰ্শনৰ আধাৰত প্ৰতিষ্ঠিত বুলি কয় মন্ত্ৰী দাসে ৷
অন্যান্য প্ৰতিষেধক গ্ৰহণৰ দৰে ক'ভিড-১৯ ভেকচিন গ্ৰহণ কৰাটোও নাগৰিকৰ এক স্বেচ্ছামূলক কাম । দেশৰ উচ্চতম ন্যায়ালয়ৰ উপৰিও কেৰালা আৰু দিল্লী উচ্চ ন্যায়ালয়ৰ শেহতীয়া তিনিটা ৰায়ে এই কথা পুনৰবাৰ দোহৰাৰ পিছতো ৰাজ্য চৰকাৰৰ কৰ্মচাৰীক ক'ভিড ভেকচিন লোৱাতো বাধ্যতামূলক কৰিছে ৷ শেহতীয়াকৈ ৰাজ্যৰ মুখ্য সচিব জিষ্ণু বৰুৱাই এই সন্দৰ্ভত জাৰি কৰা এক নিৰ্দেশনাৰ পাছতে সৃষ্টি হৈছে তীব্ৰ প্ৰতিক্ৰিয়াৰ ৷
