এইবাৰ প্ৰতীক হাজেলাৰ প্ৰতীকি শৱদেহ দাহ কৰিলে ৰাইজে

এনআৰচি চূড়ান্ত তালিকা পৰা বাদ পৰাৰ বাবে চতিয়া আৰু বকোত প্ৰতিবাদ ৷ প্ৰতীক হাজেলাৰ প্ৰতীকি শৱদেহ সাঙীত উঠাই চতিয়াত প্ৰতিবাদ কৰে বেংগলী যুৱ ছাত্ৰ ফেডাৰেছনে ৷ লগতে বকোতো সদৌ অসম গোৰ্খা ছাত্ৰ সন্থাৰ উদ্যোগত প্ৰতিবাদী কাৰ্যসূচী ৰূপায়ন কৰা হয় ।

চতিয়া, বকো, ১ অক্টোবৰঃ এনআৰচি চূড়ান্ত তালিকা প্ৰকাশ পোৱাৰ পাছৰে পৰা ৰাজ্যৰ চৌদিশে অব্যাহত আছে বিভিন্ন দল-সংগঠনৰ প্ৰতিবাদ ৷ এনআৰচিৰ পুণৰীক্ষণ প্ৰক্ৰিয়াত সম্পূৰ্ণ নথি-পত্ৰ দিয়াৰ পিছতো বিসংগতিপূৰ্ণ এখন চূড়ান্ত তালিকা প্ৰকাশ কৰা বুলি অভিযোগ তুলি প্ৰতীক হাজেলাৰ বিৰুদ্ধে মঙলবাৰে চতিয়াৰ ধলাইবিলত প্ৰতিবাদমুখৰ হৈ পৰে বেংগলী যুৱ ছাত্ৰ ফেডাৰেছনৰ লগতে স্থানীয় জনসাধাৰণ ৷

প্ৰতীক হাজেলাৰ প্ৰতীকি শৱদেহ সাঙীত উঠাই প্ৰতিবাদকাৰীসকলে প্ৰতীক হাজেলা মুৰ্দাবাদ, অসম চৰকাৰ হায় হায় আদি শ্ল’গান দি পৰিৱেশ উত্তাল কৰি তোলে ৷ প্ৰতিবাদকাৰী ৰাইজে হাজেলাৰ প্ৰতীকি শৱদেহ দাহ কৰি সদগতি কামনা কৰে ৷ ইয়াৰ পাচতে ধলাইবিল আঞ্চলিক বেংগলী যুৱ ছাত্ৰ ফেডাৰেছনৰ উদ্যোগত এখন প্ৰতিবাদী সভা অনুষ্ঠিত হয় ৷ অঞ্চলটোৰ ধলাইবিল আৰু ন-বিল গাঁৱৰ লোকসকলৰ একেখন লিগেচি ডাটা তালিকা ব্যৱহাৰ কৰাৰ পিছতো সম্পূৰ্ণ খচৰাৰ পৰা বাদ পৰিছে ৷

ইপিনে বকোতো এনআৰচিৰ চূড়ান্ত তালিকাক লৈ অসন্তুষ্টি গোৰ্খা সম্প্ৰদায়ৰ । গোৰ্খা লোকসকলৰ নাম এনআৰচিৰ চূড়ান্ত তালিকাৰ পৰা বাদ পৰাক লৈ সদৌ অসম গোৰ্খা ছাত্ৰ সন্থাৰ উদ্যোগত প্ৰতিবাদী কাৰ্যসূচী ৰূপায়ন কৰা হয় ।