ধুবুৰী, 1 জুন : কৰ'ণা ভাইৰাছ, লক্ ডাউন আৰু কোৱাৰেণ্টাইনৰ মাজতেই ধুবুৰীত উঠিছে এক চাঞ্চল্যকৰ অভিযোগ । ধুবুৰী জিলাৰ বিভিন্ন কোৱাৰেণ্টাইন কেন্দ্ৰত আৰম্ভণীৰ পৰাই উত্থাপন হৈ আহিছে খাদ্য যোগান দিয়াৰ নামত ব্যাপক দুৰ্নীতি সংঘটিত কৰাৰ এক অভিযোগ । ইটিভি ভাৰতেও এনে অভিযোগৰ ভিত্তিত ধাৰাবাহিক বাতৰি সম্প্ৰচাৰ কৰি অহাৰে সময়তে ধুবুৰীৰ ভাৰত বাংলা সীমান্তৰ দুৰাহাটী উচ্চ মাধ্যমিক বিদ্যালয়ৰ কোৱাৰেণ্টাইন কেন্দ্ৰত পুনৰ উত্থাপন হৈছে আন এটা গুৰুতৰ অভিযোগ ।
এই কোৱাৰেণ্টাইন কেন্দ্ৰটোত যোৱা 23 মে'ত মুঠ 172 জনকৈ লোক আহি উপস্থিত হৈছিল । কিন্তু সম্পূৰ্ণ 9 দিন উকলি যোৱাৰ পিছতো এই সকলৰ ভিতৰৰ বহু লোকৰ স্বাৱ টেষ্টৰ নমুনা সংগ্ৰহ কৰা নাই বুলি অভিযোগ উত্থাপন হৈছে । মাত্ৰ কেইজন মানৰ নমুনা সংগ্ৰহ কৰা হৈছে যদিও হ'ম কোৱাৰেণ্টাইন কৰা নাই সেই সকলক ।