ওদালগুৰি, 6 এপ্ৰিলঃ সৰিয়হৰ ডুলিতে ভূত । ম্যাদ উকলা বেজি যোগান ধৰিলে চৰকাৰী চিকিৎসালয়ে । নিশ্চিত বিপদৰ পৰা ৰক্ষা পৰিল দুবছৰীয়া শিশু ৷ আপোনাৰ মোৰ স্বাস্থ্যক লৈ কিমান সচেতন মন্ত্ৰী হিমন্ত বিশ্ব শৰ্মাৰ স্বাস্থ্য বিভাগ ! ওদালগুৰি অসামৰিক চিকিৎসালয়ত ঘটিল তেনে এক ঘটনা ৷ যি শুনিলে চৰকাৰী চিকিৎসালয়লৈ যাবলৈ 10 বাৰ চিন্তা কৰিব আপুনিও ৷
উল্লেখ্য যে, শুকুৰবাৰে ওদালগুৰিৰ এজন স্থানীয় লোকে নিজৰ 2 বছৰীয়া কন্যা সন্তানৰ চিকিৎসাৰ বাবে গৈছিল ওদালগুৰি অসামৰিক চিকিৎসালয়লৈ ৷ চিকিৎসকে শিশুটিক 10 টা বেজি 10দিনত দিবলৈ পৰামৰ্শ আগবঢ়ালে অভিভাৱকক ৷ সেই মৰ্মে শুকুৰবাৰে চিকিৎসালয় খনতে এটা বেজি দিয়া হৈছিল শিশুটিক । কিন্তু শনিবাৰে দ্বিতীয়টো বেজি চিকিৎসালয়ৰ ফাৰ্মাচীৰ পৰা সংগ্ৰহ কৰিবলৈ গৈ চকু কপালত উঠিল আত্মীয়ৰ ৷ চৰকাৰী চিকিৎসালয়খনে যোগান ধৰা CEFTRIAXONE নামৰ বেজিৰ ম্যাদ শেষ হৈছে বিগত ফেব্ৰুৱাৰী মাহতে । অৱশ্যে এই বিষয়টো পৰিয়ালৰ চকুত পৰা নিশ্চিত বিপদৰ পৰা ৰক্ষা পৰিল শিশুটো । ঘটনা সন্দৰ্ভত সাংবাদিকে চিকিৎসালয়খনৰ অধীক্ষকক প্ৰশ্ন কৰাত ঘটনাৰ তদন্ত কৰাৰ কথা অৱগতে কৰে ৷
আনহাতে, কেৱল মাত্ৰ কমিছন লাভ কৰাৰ অংক কৰিয়েই ম্যাদ উকলা ঔষদ সমূহ ক্ৰয় কৰে নেকি ৰাজ্যৰ স্বাস্থ্য বিভাগটোৱে? এতিয়া ইয়াকলৈও সন্দেহৰ সৃষ্টি হৈছে সচেতন নাগৰিকৰ মাজত ৷