নেশ্যনেল ডেস্ক, ৩ আগষ্ট: বিগত এমাহৰ ভিতৰতে সন্দেহজনক ড্ৰোণে দেশৰ নিৰাপত্তাৰ প্ৰতি ভাবুকিৰ সৃষ্টি কৰিছে । জম্মু-কাশ্মীৰৰ আকাশমাৰ্গত সঘনাই দেখিবলৈ পোৱা গৈছে সন্দেহজনক ড্ৰোণ । চাম্বা জিলাৰ আৰক্ষী অধীক্ষক ৰাজেশ শৰ্মাই জনোৱা মতে, সোমবাৰে নিশা চাম্বা জিলাত সন্দেহজনক ড্ৰোণ উৰি থকা দেখিবলৈ পোৱা গৈছে । যিকোনো পৰিস্থিতিৰে মোকাবিলা কৰিবলৈ আগতীয়াকৈ জিলাখনৰ সকলো আৰক্ষী চকীক সতৰ্ক কৰি দিয়া হৈছে বুলি তেওঁ জানিবলৈ দিছে ।
আনহাতে, দেওবাৰে নিশা জিলাখনৰ বৰী ব্ৰহ্মা অঞ্চলৰ চাৰিটা স্থানত সন্দেহজনক ড্ৰোণ প্ৰত্যক্ষ কৰা হয় । ইয়াৰ পূৰ্বে শুকুৰবাৰে চাম্বা জিলাৰ তিনিটা পৃথক স্থানত সন্দেহজনক ড্ৰোণ উৰিছিল । উল্লেখ্য যে, জম্মুৰ বিমানঘাটিত ড্ৰোণেৰে আক্ৰমণ সংঘটিত হোৱাৰে পৰা জম্মু-কাশ্মীৰ(Jammu and Kashmir)ৰ আকাশত সঘনাই দেখিবলৈ পোৱা গৈছে সন্দেহজনক ড্ৰোণ(Drone) । সীমান্তৰ কেইবাটাও স্থানত সেনা আৰু সীমান্ত সুৰক্ষা বাহিনীয়ে কেইখনমান ড্ৰোণলৈ লক্ষ্য কৰি গুলীচালনাও কৰিছে ।
আৰক্ষী সঞ্চালক প্ৰধান দিলবাগ সিঙে কয় যে, জম্মু-কাশ্মীৰত ড্ৰোণৰ জৰিয়তে অস্ত্ৰ আৰু নিচাজাতীয় সামগ্ৰী সৰবৰাহ কৰা, আই ই ডি বিস্ফোৰণ কৰাৰ আঁৰত আছে পাকিস্তান ভিত্তিক লস্কৰ-ই-তৈবা (Lashkar-e-Taiba) আৰু জয়ছ-ই-মহম্মদ (Jaish-e-Mohammad) । তেওঁ লগতে কয় যে, বৰ্তমান ড্ৰোণৰ আক্ৰমণ প্ৰতিৰোধী ব্যৱস্থা গ্ৰহণ কৰা হৈছে আৰু শান্তি বিঘ্নিত কৰিব পৰা যিকোনো ষড়যন্ত্ৰ বিফল কৰিবলৈ প্ৰতিৰোধী ব্যৱস্থা অধিক শক্তিশালী কৰা হ'ব । সিঙে হৌঞ্জাৰ দাচানত আকস্মিক বানপীড়িত অঞ্চলৰ আকাশী জৰীপ কৰাৰ পিছত এক নিৰাপত্তা পৰ্যালোচনা বৈঠকত ভাষণ আগবঢ়াই এই মন্তব্য কৰে ।