নিউজ ডেস্ক, 15 ডিচেম্বৰ: শুকুৰবাৰে উচ্চতম ন্যায়ালয়ে ‘কেছ ফৰ কুৱেৰী’ৰ গোচৰত লোকসভাৰ পৰা বহিষ্কাৰৰ বিৰুদ্ধে তৃণমূল কংগ্ৰেছৰ নেত্ৰী মহুৱা মৈত্ৰই দাখিল কৰা আবেদনৰ পৰীক্ষা অহা বৰ্ষৰ 3 জানুৱাৰীত কৰিবলৈ সন্মত হয় । ন্যায়াধীশ সঞ্জীৱ খান্না আৰু এছ ভি এন ভাট্টীৰ বিচাৰপীঠে কয় যে ন্যায়াধীশসকলে শুকুৰবাৰে পুৱাহে গোচৰৰ ফাইল লাভ কৰে, সেয়েহে তেওঁলোকক বিষয়টো বিবেচনা কৰিবলৈ সময়ৰ প্ৰয়োজন হ’ব ।
জ্যেষ্ঠ অধিবক্তা এ এম সিংভিয়ে মৈত্ৰই দাখিল কৰা আবেদনৰ সংক্ষিপ্ত ৰূপত যুক্তিসমূহ প্ৰকাশ কৰিবলৈ বিচাৰিছিল যদিও শীতকালীন ছুটীৰ পিছত আদালত পুনৰ মুকলি কৰাৰ ক্ষেত্ৰত বিচাৰপীঠে শুনানি পিছুৱাই দিয়ে। সিংভিয়ে দাবী কৰে যে তেওঁ গোচৰৰ ফাইল আৰু তথ্যৰ জৰিয়তে আদালতত উপস্থিত হ’ব পাৰে । ন্যায়াধীশ খান্নাই কয়, ‘‘নাই, মই নিজে পঢ়িব বিচাৰিছোঁ ।’’
এই সপ্তাহতে মৈত্ৰই এই আবেদন দাখিল কৰি তেওঁক বহিষ্কাৰৰ সিদ্ধান্তক ‘অন্যায় আৰু স্বেচ্ছাচাৰী’ আৰু স্বাভাৱিক ন্যায়ৰ নীতিৰ বিৰুদ্ধ বুলি অভিহিত কৰে । লোকসভাৰ নৈতিকতা সমিতিয়ে তেওঁৰ সংসদীয় পৰ্টেলৰ লগইন প্ৰমাণপত্ৰ ব্যৱসায়ী দৰ্শন হিৰণানন্দনীৰ সৈতে শ্বেয়াৰ কৰি ৰাষ্ট্ৰীয় নিৰাপত্তা বিপন্ন কৰাৰ অভিযোগত দোষী সাব্যস্ত কৰাৰ পিছতে মৈত্ৰক সংসদৰ পৰা বহিস্কাৰ কৰা হয় ।
প্ৰতিদ্বন্দ্বী ব্যৱসায়ী দৰ্শন হিৰণনন্দনীৰ নিৰ্দেশত উপঢৌকন লৈ আদানী গোটৰ কোম্পানী সন্দৰ্ভত সংসদত কেইবাটাও প্ৰশ্ন উত্থাপন কৰাৰ অভিযোগ মৈত্ৰৰ বিৰুদ্ধে । নৈতিকতা সমিতিয়ে তেওঁক সাংসদ হিচাপে অযোগ্য ঘোষণা কৰাৰ পৰামৰ্শ দিয়াৰ পৰিপ্ৰেক্ষিতত ৮ ডিচেম্বৰত লোকসভাই মৈত্ৰক সংসদৰ পৰা বহিষ্কাৰ কৰাৰ প্ৰস্তাৱ গৃহীত কৰে ।