নিউজ ডেস্ক, ৯ আগষ্ট : কংগ্ৰেছ নেতা ৰাহুল গান্ধীয়ে বুধবাৰে লোকসভাত মন্ত্ৰী পৰিষদৰ বিৰুদ্ধে অনাস্থা প্ৰস্তাৱত বক্তব্য ৰাখে । ৰাহুলে অধ্যক্ষ ওম বিৰলাক সংসদৰ সদস্য হিচাপে পুনৰ প্ৰদানৰ বাবে ধন্যবাদ জনায় । ৰাহুলে হিন্দীতে কয়, "মোক লোকসভাৰ সদস্য হিচাপে পুনৰ প্ৰতিস্থাপন কৰাৰ বাবে মই ওম বিৰলা ছাৰক ধন্যবাদ জনাইছোঁ ।"
উল্লেখ্য যে উচ্চতম ন্যায়ালয়ে বিগত সপ্তাহত 'মোদী উপাধি মন্তব্য গোচৰ'ত দোষী সাব্যস্তকৰণৰ ওপৰত স্থগিতাদেশ প্ৰদানৰ পিছত লোকসভালৈ উভতি অহাৰ পিছত এইটো হৈছে ৰাহুল গান্ধীৰ সদনত প্ৰথম ভাষণ ।
ৰাহুল গান্ধীয়ে নিজৰ ভাষণত চৰকাৰৰ বিৰুদ্ধে কেইটামান গুৰুত্বপূৰ্ণ বিষয় উত্থাপন কৰে । নিজৰ ভাষণত ৰাহুলে কয়, "অন্তিমবাৰ যেতিয়া মই সদনত বক্তব্য ৰাখিছিলোঁ, তেতিয়া আপোনাক অসুবিধাত পেলাইছিল, যিহেতু মই গৌতম আদানিৰ ওপৰত গুৰুত্ব দিছিলোঁ । ই আপোনাৰ (বিজেপি) জ্যেষ্ঠ নেতাসকলক অসুবিধাত পেলাইছিল । মই ক্ষমা বিচাৰিছোঁ, কিন্তু মই সঁচা কথা কৈছিলোঁ ।"
তেওঁ কয়, "বিগত বছৰ মই ১৩০ দিনৰ বাবে আন লোকসকলৰ সৈতে ভাৰতৰ এটা কোণৰ পৰা আন এটা কোণলৈ ভ্ৰমণ কৰিছিলোঁ । সাগৰৰ পৰা কাশ্মীৰলৈ মই খোজ কাঢ়িছিলোঁ । মই লাডাখো এৰি যোৱা নাছিলোঁ । (ভাৰত) যাত্ৰা সমাপ্ত হোৱা নাই । যাত্ৰাৰ সময়ত বহু লোকে মোক সুধিছিল আপোনাৰ লক্ষ্য কি । আপুনি কন্যাকুমাৰীৰ পৰা কাশ্মীৰলৈ কিয় গৈ আছে ? প্ৰথমতে মোৰ ওচৰত কোনো উত্তৰ নাছিল । মই নাজানো মই কিয় যাত্ৰা আৰম্ভ কৰিছিলোঁ । যেতিয়া মই যাত্ৰা আৰম্ভ কৰিছিলোঁ তেতিয়াহে মই বুজি পালোঁ মই মানুহৰ মাজত থাকিব বিচাৰিছিলোঁ ।"
নিজৰ ভাৰত জোড়ো যাত্ৰা সন্দৰ্ভত ৰাহুল গান্ধীয়ে লগতে কয়, "যাৰ বাবে মই মৰিবলৈ সাজু, যাৰ বাবে মই কাৰাগাৰলৈ যাবলৈ সাজু, যাৰ বাবে মই ১০ বছৰ ধৰি তিৰস্কাৰ শুনি আহিছোঁ, সেইটো কি, যাৰ ওচৰত মই থাকিব বিচাৰোঁ, তাক মই বুজিব বিচাৰিছিলোঁ । দৈনিক পুৱা ৬ বজাৰ পৰা নিশালৈকে- মই সকলোৰে কথা শুনিছিলোঁ, সেয়া হৈছে দেশৰ জনসাধাৰণৰ কণ্ঠ ।"
মণিপুৰ প্ৰসংগত ৰাহুল গান্ধীয়ে কয়, "মই মণিপুৰৰ সাহায্য শিবিৰলৈ গৈছিলোঁ আৰু মহিলাসকলৰ সৈতে কথা পাতিছিলোঁ । কিন্তু মই আপোনালোকক দুটা উদাহৰণ দিব বিচাৰোঁ । এগৰাকী মহিলাই কৈছিল যে তেওঁৰ মাত্ৰ এটা সন্তান আছিল আৰু সন্তানটোক তেওঁৰ সন্মুখতে গুলীয়াই হত্যা কৰা হৈছিল । মহিলাগৰাকীয়ে কৈছিল যে তেওঁ গোটেই নিশাটো মৃত সন্তাটোৰ সৈতে আছিল । তেওঁ কৈছিল যে তেওঁ সকলো হেৰুৱাইছে । আন এটা শিবিৰত এগৰাকী মহিলাক তেওঁৰ কি হৈছে বুলি সোধাত তেওঁ কঁপিবলৈ আৰম্ভ কৰিছিল আৰু তাৰ পিছত তেওঁ মূৰ্ছা গৈছিল । এই লোকসকলে (বিজেপি) মণিপুৰত হিন্দুস্তানক হত্যা কৰিছে । তেওঁলোকে মণিপুৰত দেশখনক হত্যা কৰিছে ।"
আনহাতে, বিজেপি তথা প্ৰধানমন্ত্ৰীক সমালোচনা কৰি ৰাহুল গান্ধীয়ে কয়, "ৰাৱণে কেৱল দুজন লোকৰ কথা শুনিছিল- মেঘনাদ আৰু কুম্ভকৰ্ণৰ । একেদৰে প্ৰধানমন্ত্ৰী নৰেন্দ্ৰ মোদীয়েও দুজন মানুহৰে কথা শুনে । তেওঁলোক হৈছে অমিত শ্বাহ আৰু গৌতম আদানি । লংকা হনুমানে জ্বলোৱা নাছিল, কিন্তু ৰাৱণৰ অহংকাৰে জ্বলাইছিল । আপুনিও সমগ্ৰ দেশখ জ্বলাই দিবলৈ চেষ্টা কৰি আছে । প্ৰথমে আপুনি মণিপুৰ জ্বলাইছে আৰু এতিয়া আপুনি হাৰিয়ানাতো একেই কাম কৰি আছে ।"
লগতে পঢ়ক :Tushar Gandhi detain by police: মহাত্মা গান্ধীৰ নাতি তুষাৰ গান্ধীক আটক
