নেশ্যনেল ডেস্ক,৩১ অক্টোবৰ :আজি দেশৰ প্ৰথম গৃহ মন্ত্ৰী চৰ্দাৰ বল্লভভাই পেটেলৰ জন্ম জয়ন্তী । সেই উপলক্ষে দেশজুৰি ৰাষ্ট্ৰীয় একতা দিৱসৰ আয়োজন কৰা হৈছে । এই বিশেষ মুহূৰ্তত প্ৰধানমন্ত্ৰী নৰেন্দ্ৰ মোদীয়ে গুজৰাটৰ একতা নগৰত চৰ্দাৰ বল্লভভাই পেটেলৰ জন্ম জয়ন্তীত পুষ্পাঞ্জলি জ্ঞাপন কৰে । তেওঁ ঘোষণা কৰে যে আজি ভাৰত সফলতাৰ এক নতুন শীৰ্ষত আছে । জি-২০ সন্মিলনত ভাৰতৰ সম্ভাৱনা দেখি বিশ্ব আচৰিত হৈছে বুলিও তেওঁ দাবী কৰে ।
তেওঁৰ মতে কেইবাটাও গোলকীয় সংকটৰ মাজতো ভাৰতৰ সীমা সুৰক্ষিত হৈ আছে । প্ৰধানমন্ত্ৰীগৰাকী গৌৰৱান্বিত যে অহা কেইবছৰমানৰ ভিতৰত ভাৰত বিশ্বৰ তৃতীয় বৃহত্তম অৰ্থনীতি হ'বলৈ গৈ আছে । তেওঁ গৌৰৱান্বিত যে আজি ভাৰত চন্দ্ৰৰ সেই অংশত উপনীত হৈছে, য'ত কোনো দেশেই উপনীত হ'বলৈ সক্ষম হোৱা নাছিল । তেওঁ গৌৰৱ প্ৰকাশ কৰি কয় যে আজি ভাৰতে তেজস যুঁজাৰু বিমানৰ পৰা আইএনএছ বিক্ৰান্তলৈ নিজৰ প্ৰস্তুতি চলাই আছে । প্ৰধানমন্ত্ৰীৰ মতে ভাৰতৰ পেছাদাৰীসকলে বিশ্বৰ বিলিয়ন ডলাৰৰ কোম্পানীবোৰ চলাই আছে আৰু নেতৃত্ব দি আছে । বিশ্বৰ বৃহৎ ক্ৰীড়া প্ৰতিযোগিতাবোৰতো ভাৰতৰ ত্ৰিৰংগা গৌৰৱেৰে উৰিছে । আনহাতে ভাৰতৰ যুৱপ্ৰজন্মই অভিলেখ ভংগ কৰিছে আৰু পদক লাভ কৰিছে বুলিও উল্লেখ কৰে প্ৰধানমন্ত্ৰীগৰাকীয়ে ।