নেশ্যনেল ডেস্ক, ১৮ ছেপ্টেম্বৰ :আজিৰে পৰা সংসদৰ ৫ দিনীয়া বিশেষ অধিবেশন আৰম্ভ হ'ব । অধিবেশন পুৰণি সংসদ ভৱনৰ পৰা আৰম্ভ হ'ব । এই সময়ছোৱাত, সাংসদসকলে পুৰণি সংসদ ভৱনৰ বিষয়েও আলোচনা কৰিব । পুৰণি সংসদ ভৱনৰ ৭৫ বছৰীয়া যাত্ৰাও স্মৰণ কৰা হ'ব । সূত্ৰৰ মতে ১৯ ছেপ্টেম্বৰৰ পৱিত্ৰ দিনটোত অৰ্থাৎ মঙলবাৰে সম্পূৰ্ণ ৰীতি-নীতিৰে উপাসনা কৰাৰ পাছত সংসদৰ কাম-কাজ পুৰণি সংসদ ভৱনৰ পৰা নতুন সংসদ ভৱনলৈ লৈ যোৱা হ'ব । যাৰ বাবে ব্যাপক প্ৰস্তুতি কৰি থকা হৈছে । একে সময়তে দেওবাৰে পুৰণি সংসদ ভৱনত পতাকা উত্তোলনৰ কাৰ্যসূচীৰো আয়োজন কৰা হয় ।
সূত্ৰৰ মতে সংসদত ৫ খন গুৰুত্বপূৰ্ণ বিধেয়ক উত্থাপন কৰা হ'ব । ডাকঘৰ বিধেয়ক ২০২৩ আৰু মুখ্য নিৰ্বাচনী আয়ুক্ত আৰু নিৰ্বাচনী আয়ুক্ত নিযুক্তি সম্পৰ্কীয় বিধেয়কো উত্থাপন কৰা হ'ব । এই দুয়োখন বিধেয়ক প্ৰথমে ৰাজ্যসভাত উত্থাপন কৰা হ'ব । ইয়াৰ উপৰিও, লোকসভাত অধিবক্তা সংশোধনী বিধেয়ক ২০২৩ আৰু প্ৰেছ এণ্ড ৰেজিষ্ট্ৰেচন অফ পিৰিঅ'ডিকেলছ বিধেয়ক ২০২৩ উত্থাপন কৰা হ'ব । দুয়োখন বিধেয়ক ইতিমধ্যে ৰাজ্যসভাত গৃহীত হৈছে ।
নতুন সংসদ ভৱনত মঙলবাৰৰ পৰা আনুষ্ঠানিকভাৱে কাম কৰা আৰম্ভ হ'ব । নতুন ভৱনটোত সকলো বস্তুৱে এক নতুন ৰূপত দেখা যাব । আনকি কৰ্মচাৰীসকলৰ পোছাকো সলনি কৰা হ'ব ।