নেশ্যনেল ডেস্ক, 23 জুন: 2024 চনৰ লোকসভা নিৰ্বাচনত বিজেপিক প্ৰত্যাহ্বান জনাবলৈ বিহাৰৰ মুখ্যমন্ত্ৰী নীতিশ কুমাৰৰ তৎপৰতাত একত্ৰিত হৈছে দেশৰ বিৰোধী ৰাজনৈতিক দলসমূহ ৷ শুকুৰবাৰে বিহাৰৰ পাটনাত 17 টা বিৰোধী দলে বৈঠকত মিলিত হয় ৷ এই বৈঠকত 2024 ৰ নিৰ্বাচনত কি দৰে বিজেপিক পৰাভূত কৰিব পাৰি সেই সম্পৰ্ক বিশদভাৱে আলোচনা কৰে দলকেইটাই ৷ নীতিশ কুমাৰৰ অধ্যক্ষতাত বৈঠক সমাপ্ত হোৱাৰ পাচতেই বৈঠকত লোৱা সিদ্ধান্তসমূহ অৱগত কৰি এক সৰ্বদলীয় সংবাদমেল সম্বোধন কৰা হয় ৷
প্ৰায় চাৰি ঘণ্টা ধৰি চলি থকা বৈঠকৰ পিচত সম্বোধন কৰা এই যুটীয়া সংবাদমেলত বিহাৰৰ মুখ্যমন্ত্ৰী নীতিশ কুমাৰে কয় যে কেইদিনমানৰ ভিতৰত বিজেপিৰ বিৰুদ্ধে একেলগে যুঁজ দিয়াৰ পৰিকল্পনাক চূড়ান্ত ৰূপ দিবলৈ সকলো দল বৈঠকত মিলিত হ’ব ৷ তেওঁ লগতে কয়,‘‘17 টা দলে একেলগে কাম কৰাৰ আৰু লোকসভা নিৰ্বাচনত ঐক্যবদ্ধভাৱে প্ৰতিদ্বন্দিতা কৰাৰ সিদ্ধান্ত লৈছে ৷’’
তেওঁ লগতে কয়, ‘‘আমি এক উমৈহতীয়া কাৰ্যসূচী প্ৰস্তুত কৰাৰ সিদ্ধান্ত লৈছোঁ আৰু কেনেদৰে আগবাঢ়িব লাগে সেই বিষয়ে পৰৱৰ্তী বৈঠকত সিদ্ধান্ত লম ৷ আমি প্ৰতিখন ৰাজ্যৰ বাবে পৃথক পৰিকল্পনা বিকশিত কৰিব লাগিব আৰু আমি কেন্দ্ৰত বিজেপিক সিংহাসনচ্যুত কৰিবলৈ একেলগে কাম কৰিম ৷’’
সংবাদমেলত পশ্চিমবংগৰ মুখ্যমন্ত্ৰী মমতা বেনাৰ্জীয়ে কয় যে এই বৈঠকত সকলো বিৰোধী দলে বিজেপিৰ বিৰুদ্ধে একত্ৰিত হৈ যুঁজ দিয়াৰ সিদ্ধান্ত গ্ৰহণ কৰিছে ৷ তেওঁ লগতে কয়, ‘‘আমি সকলো একত্ৰিত আৰু আমি একতাৰে যুঁজ দিম ৷ আমাৰ উদ্দেশ্যে হৈছে ফেচিষ্ট চৰকাৰৰ বিৰুদ্ধে মাত মতা ৷ বিজেপিয়ে একনায়কত্ববাদ চলাই আছে ৷ নিৰ্বাচিত চৰকাৰসমূহক বিজেপিয়ে গুৰুত্ব প্ৰদান নকৰি নিজ ইচ্ছামতে সিদ্ধান্ত গ্ৰহণ কৰিছে ৷ বিজেপিয়ে সাধাৰণ জনতাৰ বাবে কেতিয়াও চিন্তা কৰা নাই ৷ দেশৰ অৰ্থনীতি যে ধ্বংস হৈছে সেই কথাও বিজেপিয়ে চিন্তা কৰা নাই ৷’’
সংবাদমেলত NCPৰ মুৰব্বী শাৰদ পাৱাৰে কয় যে যি ৰাজ্যত বিজেপিৰ চৰকাৰ নাই সেই ৰাজ্যৰ প্ৰতি কেন্দ্ৰই গুৰুত্ব প্ৰদান নকৰে ৷ বৈঠক বিজেপিৰ বিৰুদ্ধে একত্ৰিত হৈ যুঁজ দিয়াৰ সিদ্ধান্ত গ্ৰহণ কৰা হৈছে বুলিও শাৰদ পাৱাৰে উল্লেখ কৰে ৷