নেশ্যনেল ডেস্ক, ২১ নৱেম্বৰ :অতি শীঘ্ৰে প্ৰকাশ পাব নাগৰিকত্ব সংশোধনী আইনৰ (CAA) নতুন নিয়ম । এই ঘোষণা কেন্দ্ৰীয় জল শক্তি মন্ত্ৰী গজেন্দ্ৰ সিং শ্বেখাৱতৰ (Gajendra Singh Shekhawat) । শনিবাৰে পাকিস্তানৰ পৰা বহিস্কৃত হিন্দু পৰিয়ালৰ (Pakistani displaced Hindu families) 'দেৱালী স্নেহ মিলন' অনুষ্ঠানত এইকথা প্ৰকাশ কৰে । কেন্দ্ৰীয় মন্ত্ৰীগৰাকীয়ে হিন্দু প্ৰব্ৰজনকাৰীসকলক সকলো সম্ভৱ সহায়ৰো আশ্বাস দিয়ে ।
শ্বেখাৱতে কয় যে, ২০১৪ চনত তেওঁ সংসদত পাকিস্তানৰ দৰিদ্ৰ হিন্দু ভাতৃসকলৰ প্ৰসংগ উত্থাপন কৰিছিল । কেন্দ্ৰীয় মন্ত্ৰীগৰাকীয়ে সেই সময়ৰ কথা স্মৰণ কৰি কয় যে বহিস্কৃত হিন্দু ভাতৃসকলে তেতিয়া সহজে নাগৰিকত্ব লাভ কৰা নাছিল । তেওঁলোকে কোনো ধৰণৰ সুবিধাও লাভ কৰা নাছিল । তেতিয়া প্ৰধানমন্ত্ৰী নৰেন্দ্ৰ মোডীয়ে (Narendra Modi) তেওঁলোকৰ এই সমস্যা বুজি পাইছিল আৰু তেতিয়াৰ গৃহমন্ত্ৰী ৰাজনাথ সিঙৰ (Raj Nath Singh) প্ৰচেষ্টাৰ বাবে হিন্দু প্ৰব্ৰজনকাৰীসকলে কিছু সুবিধা লাভ কৰিছিল ।
তেওঁৰ মতে ই সমস্যাটোৰ স্থায়ী সমাধান নহয় । সেয়েহে, প্ৰধানমন্ত্ৰী মোডী আৰু গৃহমন্ত্ৰী অমিত শ্বাহে (Amit Shah) নাগৰিকত্ব সংশোধনী আইন আনিছে বুলিও তেওঁ উল্লেখ কৰে ।
শ্বেখাৱতে লগতে কয় যে, কংগ্ৰেছ (Congress), আম আদমী পাৰ্টিকে (AAP) ধৰি বিৰোধী দলসমূহে নাগৰিকত্ব সংশোধনী বিধেয়কৰ বিৰুদ্ধে প্ৰতিবাদ কৰিছিল । ৰাজস্থানৰ মুখ্যমন্ত্ৰী অশোক গেহলটে প্ৰতিবাদত যোগদান কৰিছিল । তেওঁৰ মতে এইটো সঁচা কথা যে এটা নিৰ্দিষ্ট শ্ৰেণীৰ লোকে অবৈধভাৱে ভাৰতত প্ৰৱেশ কৰিছে । মন্ত্ৰীগৰাকীৰ মতে তেওঁলোকে দেশৰ সম্পদবোৰ দখল কৰিছে ।
পশ্চিমবংগৰ মুখ্যমন্ত্ৰী মমতা বেনাৰ্জীক (Mamata Banerjee) সমালোচনা কৰি তেওঁ কয় যে মুখ্যমন্ত্ৰীগৰাকীয়ে এনে অনুপ্ৰৱেশকাৰীৰ সপক্ষে সমদল উলিয়াই দিয়াটো আচৰিত কথা । অনুষ্ঠানত শ্বেখাৱতে কয় যে বিভাজনৰ সময়ত ভাৰত আৰু পাকিস্তানৰ শাসকসকলে আশ্বাস দিছিল যে ধৰ্মৰ ভিত্তিত কোনো বৈষম্য কৰা নহ'ব । স্বাধীনতাৰ ৭৫ বছৰৰ পিছত, ভাৰতে একে নীতি অনুসৰি চলি আছে ।
ভাৰতে কোনো ধৰ্মৰ প্ৰতি কোনো উদাসীনতা দেখুওৱা নাছিল, কিন্তু পাকিস্তান-বাংলাদেশত হিন্দু জনসংখ্যা ২৮ শতাংশৰ পৰা ২ শতাংশলৈ হ্ৰাস পাইছে । আজিও সেই দেশবোৰত ধৰ্মৰ নামত অত্যাচাৰ অব্যাহত আছে বুলি দুখ প্ৰকাশ কৰে কেন্দ্ৰীয় মন্ত্ৰীগৰাকীয়ে । মন্ত্ৰীগৰাকীয়ে কয় যে ৰাজস্থান, অসম আৰু পশ্চিমবংগত বসতি স্থাপন কৰা পাকিস্তান আৰু বাংলাদেশৰ হিন্দু বহিস্কৃত লোকসকলৰ বেদনা তেওঁ বুজি পায় । 'দেৱালী স্নেহ মিলন' (Diwali Sneh Milan) অনুষ্ঠানটোত বহু সংখ্যক পাকিস্তানৰ পৰা বহিস্কৃত হিন্দু পৰিয়ালে অংশগ্ৰহণ কৰিছিল ।
লগতে পঢ়ক :পাচিঘাটলৈ গৈ কি ক’লে কেন্দ্ৰীয় মন্ত্ৰী সৰ্বানন্দ সোণোৱালে ?
