নেশ্যনেল ডেস্ক, ৭ জানুৱাৰী: বহু কেইখন ৰাজ্যত বাৰ্ড ফ্লুৰ ভয়াৱহতা অব্যাহত থকাৰ মাজতে বৃহস্পতিবাৰে জম্মু-কাশ্মীৰৰ উধমপুৰ জিলাত উদ্ধাৰ হয় ১৫০টা মৃত কাউৰী । এই ঘটনাৰ পিছতে জম্মু-কাশ্মীৰ চৰকাৰে জীৱন্ত পক্ষীৰ আমদানিৰ ক্ষেত্ৰত প্ৰতিবন্ধকতা আনিছে । ফাৰ্মৰ হাঁহ-কুকুৰাৰ মাংস আমদানিও নিষিদ্ধ কৰা হৈছে কেন্দ্ৰীয় শাসিত অঞ্চলটোত । চলিত বৰ্ষৰ অহা ১৪ জানুৱাৰীৰ পৰা এই নতুন নিয়ম কাৰ্যকৰী কৰা হ'ব ।
চুবুৰীয়া কেইবাখনো ৰাজ্যত বাৰ্ড ফ্লুৰ সংক্ৰমণ বৃদ্ধি হোৱাৰ পৰিপ্ৰেক্ষিতত এই সিদ্ধান্ত গ্ৰহণ কৰিছে জম্মু-কাশ্মীৰ চৰকাৰে । আনহাতে, বৃহস্পতিবাৰে জম্মু-কাশ্মীৰৰ উধমপুৰ জিলাত কাউৰীৰ মৃত্যু হোৱা ঘটনাৰ প্ৰকৃত কাৰণ বিচাৰি উলিয়াবলৈ মৃত কাউৰীৰ নমুনা পৰীক্ষাৰ বাবে প্ৰেৰণ কৰা হৈছে । ঠাণ্ডা সহ্য কৰিব নোৱাৰি কাউৰীকেইটাৰ মৃত্যু হৈছে বুলি সন্দেহ প্ৰকাশ কৰিছে উধমপুৰ জিলাৰ পশুপালন বিভাগৰ মুৰব্বী বিষয়া ড০ ইন্দ্ৰজিৎ সিঙে । লগতে ভাইৰাছৰ দ্বাৰা সংক্ৰমিত হৈ মৃত্যু হৈছে নেকি সেই বিষয়ে নিশ্চিত হোৱাৰ বাবে যাৱতীয় পৰীক্ষা কৰা হ'ব বুলিও জানিবলৈ দিছে বিষয়াগৰাকীয়ে ।