নিউজ ডেস্ক, ১২ জুলাই : হতাশাৰ চাৰি বছৰ পিছত ইছৰোৰ চন্দ্ৰযানে শুকুৰবাৰে তৃতীয় অভিযানত চন্দ্ৰৰ ফালে উৰিবলৈ সাজু হৈছে । এই অভিযানৰ চন্দ্ৰপৃষ্ঠত সফল আৰু মসৃণ অৱতৰণে দেশক চন্দ্ৰ অভিযান সম্পূৰ্ণ কৰা অভিজাত ৰাষ্ট্ৰৰ ক্লাবৰ তালিকাত প্ৰৱেশ ঘটাব । 'ফেট বয়' এলভিএম৩-এম৪ ৰকেটে দেশৰ উচ্চাকাংক্ষী চন্দ্ৰ অভিযানৰ অংশ হিচাপে চন্দ্ৰযান-৩ কঢ়িয়াই নিব । যাৰ বাবে ভাৰতীয় মহাকাশ গৱেষণা সংস্থাই ১৪ জুলাইত শ্ৰীহৰিকোটাৰ মহাকাশবন্দৰৰ পৰা বৃহৎ প্ৰত্যাশিত উৎক্ষেপণৰ বাবে সাজু হৈছে । আনহাতে, চন্দ্ৰযানৰ চন্দ্ৰপৃষ্ঠত মসৃণ অৱতৰণ আগষ্টৰ শেষৰ ফালে পৰিকল্পনা কৰা হৈছে ।
উল্লেখ্য, ২০১৯ চনত চন্দ্ৰযান-২ অভিযান ব্যৰ্থ হৈছিল । সেইবাৰ চন্দ্ৰপৃষ্ঠত চন্দ্ৰযানৰ আকাংক্ষিত মসৃণ অৱতৰণ লাভ কৰাত ব্যৰ্থ হৈছিল । যাৰ ফলত ইছৰো দলটো একপ্ৰকাৰ হতাশাত ভাগি পৰিছিল । কিন্তু বিৰল কৃতিত্ব অৰ্জন কৰা প্ৰত্যক্ষ কৰিবলৈ উপস্থিত থকা প্ৰধানমন্ত্ৰী নৰেন্দ্ৰ মোদীয়ে তদানীন্তন ইছৰোৰ মুৰব্বী কে শিৱানক সান্ত্বনা দিয়াৰ ছবি বহুতৰে স্মৃতিত এতিয়াও সজীৱ হৈ আছে ।
সতীশ ধাৱন মহাকাশ কেন্দ্ৰৰ বিজ্ঞানীসকলে কেইবা ঘণ্টাৰ কঠোৰ পৰিশ্ৰম বিনিয়োগ কৰাৰ পিছত বৰ্তমান চন্দ্ৰপৃষ্ঠত মসৃণ অৱতৰণৰ প্ৰযুক্তি আয়ত্ত কৰাৰ লক্ষ্য ৰাখিছে । এই সফলতাই আমেৰিকা যুক্তৰাষ্ট্ৰ, চীন আৰু পূৰ্বৰ ছোভিয়েট ইউনিয়নৰ পিছত এই কৃতিত্ব অৰ্জন কৰা ভাৰতক কেৱল চতুৰ্থখন দেশ হিচাপে পৰিগণিত কৰি তুলিব ।