নেশ্যনেল ডেস্ক,৫ ছেপ্টেম্বৰ :সম্প্ৰতি 'ইণ্ডিয়া' আৰু 'ভাৰত'ক লৈ ব্যাপক চৰ্চা অব্যাহত আছে । ইণ্ডিয়াৰ পৰিৱৰ্তে ভাৰত ব্যৱহাৰ কৰাত গুৰুত্ব আৰোপ কৰিছে কেন্দ্ৰীয় চৰকাৰ তথা বিজেপিয়ে । বিৰোধী মিত্ৰজোঁটৰ নাম 'INDIA' হোৱাৰ বাবেই দেশৰ 'ইণ্ডিয়া' নামকলৈ চিন্তিত হৈছে শাসকীয় পক্ষ । বহু শাসকীয় নেতাই আনকি জনসাধাৰণক ইণ্ডিয়াৰ পৰিৱৰ্তে ভাৰত নাম ব্যৱহাৰ কৰিবলৈ আহ্বান জনাইছে । একাংশ নেতাই আকৌ ইণ্ডিয়া আঁতৰাই নিজৰ সামাজিক মাধ্যমৰ প্ৰফাইলত ভাৰত লিখিছে ।
ইয়াৰ মাজতে এইবাৰ জি-২০ বৈঠকৰ নিমন্ত্ৰণী পত্ৰতো 'ইণ্ডিয়া'ৰ পৰিৱৰ্তে ব্যৱহাৰ কৰা হ'ল 'ভাৰত' । ভাৰতৰ ৰাষ্ট্ৰপতিৰ জি-২০ৰ নৈশ ভোজৰ নিমন্ত্ৰণ সন্দৰ্ভত প্ৰতিক্ৰিয়া ব্যক্ত কৰি কংগ্ৰেছ নেতা শশী থাৰুৰে মঙলবাৰে কয় যে ইণ্ডিয়াক 'ভাৰত' বুলি কোৱাত কোনো সাংবিধানিক আপত্তি নাই । থাৰুৰে অৱশ্যে আশা কৰে যে চৰকাৰ ইমানো মুৰ্খ নহয় যে তেওঁলোকে ইণ্ডিয়াক সম্পূৰ্ণৰূপে শেষ কৰিব কিয়নো ইয়াৰ ব্ৰেণ্ড মূল্য অতুলনীয় ।