নিউজ ডেস্ক, ১৮ জুলাই :সমগ্ৰ দেশতে বিলাহীৰ মূল্যই খাদ্য ৰসিকক খাদ্যৰ সোৱাদ লাভৰ পৰা বঞ্চিত কৰিছে । চালাডতো বাদে দিয়ক, বহু লোকে নিজৰ খাদ্য তালিকাৰ পৰাও বিলাহী ব্যৱহাৰ বাদ দিছে । এইবাৰ বিলাহীৰ মূল্য প্ৰতিকিলোগ্ৰামত ১৫০-২০০ টকা আৰু ততোধিক ২৫০ টকাত বিক্ৰী হৈছে । আনহাতে, বিলাহীৰ অত্যধিক মূল্যৰ বাবে বিশ্ববিখ্যাত বহুজাতিক খাদ্য কোম্পানী মেকডনাল্ডছৰ বাৰ্গাৰৰ পৰাও বিলাহী নাইকিয়া হৈছে । বৰ্তমান ৰেষ্টুৰেণ্টৰ পৰা আৰম্ভ কৰি সাধাৰণ মানুহৰ পাকঘৰলৈকে বিলাহী উধাও হৈছে । কিন্তু ইয়াৰ মাজতে বিলাহী উৎপাদক কৃষকসকলৰ বাবে ভাল দিন আহিছে । বিলাহীয়ে বজাৰত ইমান ভাল মূল্য পাইছে যে কৃষকসকলৰ মুখত হাঁহি বিৰিঙিছে ।
হিমাচল প্ৰদেশৰ মাণ্ডি জিলাৰ বলহঘাটিৰ কৃষক জয়ৰাম চাইনী হৈ পৰিছে বিলাহীৰ বাবে কোটিপতি । ৬৭ বছৰীয়া জয়ৰাম চাইনীৰ মতে, তেওঁ বিগত পাঁচ দশক ধৰি বিলাহীৰ খেতি কৰি আহিছে, কিন্তু এইবাৰ বজাৰত পোৱা বিলাহীৰ মূল্য কেতিয়াও পোৱা নাই । মাণ্ডি জিলাৰ ধাবান গাঁৱৰ জয়ৰাম চাইনী এইবাৰ বিলাহী বিক্ৰী কৰি কোটিপতি হৈ পৰিছে ।
চলিত ঋতুত এতিয়ালৈকে জয়ৰাম চাইনীয়ে ৮৩০০ বাকচ বিলাহী ১ কোটি ১০ লাখ টকাত বিক্ৰী কৰিছে । জয়ৰাম চাইনীৰ দুই পুত্ৰ সতীশ আৰু মনীষেও তেওঁলোকৰ পিতৃক এই খেতিত সহায় কৰে । ডাঙৰ পুত্ৰ সতীশ এজন চৰকাৰী শিক্ষক । তেওঁ পিতৃৰ কৃষিকৰ্মত হাত আগবঢ়াই আহিছে । আনহাতে, সৰু পুত্ৰ সতীশে তেওঁৰ পিতৃৰ সৈতে খেতিৰ কাম চম্ভালে । সতীশৰ মতে, তেওঁলোকৰ বিলাহী পোনপটীয়াকৈ দিল্লীৰ আজাদপুৰ মাণ্ডিলৈ প্ৰেৰণ কৰে । য'ত তেওঁলোকে বিলাহীৰ বহু ভাল দাম পাইছে ।
অৱশ্যে এইখিনিতে উল্লেখযোগ্য যে এইবাৰ কৃষকসকলে বিলাহীৰ ভাল মূল্য লাভ কৰিছে । জয়ৰামে কয় যে যোৱা বছৰ তেওঁ ১০,০০০ ক্ৰেট বিলাহী বিক্ৰী কৰিছিল । তাৰ পৰা ৫৫ লাখ টকা উপাৰ্জন হৈছিল । আনহাতে, তেওঁ এইবাৰ ৮৩০০ ক্ৰেট বিলাহী বিক্ৰী কৰি কোটিপতি হৈ পৰিছে ।