নেশ্যনেল ডেস্ক, 7 নৱেম্বৰ:আজিৰ সমাজত কিমান সুৰক্ষতি নাৰী ? পিছে এই প্ৰশ্ন আজিৰ নহয়, প্ৰতিদিনে দেশত বৃদ্ধি হোৱা নাৰী নিৰ্যাতনৰ ঘটনাই এই প্ৰশ্ন অধিক প্ৰাসংগিক কৰি তুলিছে ৷ এইবাৰ উত্তৰ প্ৰদেশত যৌন উৎপীড়নৰ বলি হৈ এগৰাকী ছাত্ৰীয়ে বিদ্যালয় এৰি ঘৰতে সোমাই থাকিবলগীয়া ঘটনা পোহৰলৈ আহিছে ৷
উল্লেখ্য যে, NCRB ৰ 2022 চনৰ তথ্যত প্ৰকাশ পোৱা অনুসৰি দেশৰ ভিতৰতে সৰ্বাধিক নাৰীজনিত অপৰাধ সংঘটিত হোৱা ৰাজ্যখন হৈছে উত্তৰ প্ৰদেশ ৷ 2021 চনত উত্তৰ প্ৰদেশত 48 টা ধৰ্ষণ কৰি হত্যা কৰাৰ ঘটনা সংঘটিত হৈছে ।
ঘটনা অনুসৰি উত্তৰ প্ৰদেশৰ মীৰাটত এগৰাকী দশম শ্ৰেণীৰ ছাত্ৰী বিদ্যালয় যোৱাৰ পথত প্ৰতিদিনে এজন যুৱকে তেওঁক জোকাৱাৰ লগতে অশ্লীল ইংগিত দিছিল (Student molested in meerut)৷ প্ৰথমে তেওঁ যুৱকজনক আওকাণ কৰিছিল ৷ ছাত্ৰীগৰাকীয়ে যুৱকজনক আওকাণ কৰা দেখি যুৱকজনে এইবাৰ ছাত্ৰীগৰাকীক অনুসৰণ কৰিবলৈ আৰম্ভ কৰে (Girl molestation in Meerut)৷
সদায় যুৱকজনে ছাত্ৰীগৰাকীক উদ্দেশ্যি অভব্য মন্তব্য কৰাৰ লগতে প্ৰেমৰ প্ৰস্তাৱ মানি লবলৈ হেঁচা প্ৰয়োগ কৰিছিল ৷ কিন্তু ছাত্ৰীগৰাকীয়ে নিজৰ সিদ্ধান্তত অটল থকাত যুৱকজনৰ খং উঠে ৷ ছাত্ৰীগৰাকীক ক্ৰমান্বয়ে গালি-শপনি দিয়াৰ লগতে ভাবুকি দিবলৈ আৰম্ভ কৰে যুৱকজনে ৷ এদিন যুৱকজনে ছাত্ৰীগৰাকীক যুৱকজনৰ প্ৰস্তাৱ মানি নল’লে এচিড ঢালি জ্বলাই দিয়াৰ ভাবুকি দিয়ে ৷
যুৱকজনৰ এই ভাবুকিত আতংকিত হৈ ছাত্ৰীগৰাকীয়ে বিদ্যালয় এৰাৰ সিদ্ধান্ত গ্ৰহণ কৰে ৷ ছাত্ৰীগৰাকীকক ঘৰৰ লোকেও বিদ্যালয়লৈ যাবলৈ বাধা দিয়ে(Girl student left school from two years in Meerut)৷ এই ঘটনা 2020 চনতেই সংঘটিত হৈছিল ৷ তাৰ পিছৰ পৰাই ছাত্ৰীগৰাকীয়ে যোৱা দুবছৰ পৰ্যন্ত ঘৰৰ ভিতৰতেই সোমাই আছিল ৷ সম্প্ৰতি ছাত্ৰীগৰাকীৰ ভৱিষ্যতক লৈ চিন্তিত হৈছে পৰিয়ালৰ লোক ৷
এই ঘটনা সন্দৰ্ভত ছাত্ৰীগৰাকীৰ পৰিয়ালে আৰক্ষীৰ কাষ চাপিছিল যদিও কোনো পদক্ষেপ নললে আৰক্ষীয়ে ৷ উল্লেখ্য যে, ছাত্ৰীগৰাকীৰ পিতৃয়ে কোৱা অনুসৰি যুৱকজনক এক অপৰাধী প্ৰকাৰৰ ব্যক্তি আছিল ৷ সি বিভিন্ন সময়ত গাঁওখনৰ আন মহিলাসকলকো অশ্লীল মন্তব্য কৰাৰ লগতে আৰু যৌন উৎপীড়ন কৰাৰ দৰে ঘটনা সংঘটিত কৰিছিল ৷ এতিয়া ছাত্ৰীগৰাকীৰ লগতে পৰিয়ালে আৰক্ষীক এই সন্দৰ্ভত পদক্ষেপ ল’বলৈ দাবী কৰিছে ।
লগতে পঢ়ক:Smuggled wood seized: ধুবুৰীত বৃহৎ পৰিমাণৰ চোৰাং কাঠসহ ট্ৰাক জব্দ
