২৯ বছৰৰ পিছত আৰক্ষীৰ জালত পৰিল সুভাষ ৰামকৃষ্ণ নাখলে

বিগত ২৯ বছৰে সুভাষ ৰামকৃষ্ণ নাখলেই আৰক্ষীৰ চকুত ধূলি দি ভুৱা পৰিচয়েৰে বাস কৰি আছিল মহাৰাষ্ট্ৰত । অৱশেষত আৰক্ষীয়ে আটক কৰিলে হত্যাকাণ্ডৰ অভিযুক্ত সুভাষ ৰামকৃষ্ণ নাখলেক । খঙৰ ভমকত এগৰাকী বিষয়াক গুলীয়াই হত্যা কৰিছিল নাখলেই । কিন্তু কোন এই সুভাষ ৰামকৃষ্ণ নাখলে আৰু কিয় হত্যা কৰিছিল বিষয়াগৰাকীক ?

নেশ্যনেল ডেস্ক, ২ আগষ্ট: ১৯৯২ চনৰ ৩ জুনত সংঘটিত হৈছিল এক হত্যাকাণ্ড । এজন চি আৰ পি এফ(Central Reserve Police Force) জোৱানে গুলীয়াই হত্যা কৰিছিল এগৰাকী বিষয়াক । আহত হৈছিল কেইবাগৰাকীও জোৱান । এই হত্যাকাণ্ডৰ অভিযুক্ত বিগত ২৯ বছৰে পলাতক হৈ আছিল ।

অৱশেষত আৰক্ষীৰ জালত পৰিল অভিযুক্ত সুভাষ ৰামকৃষ্ণ নাখলে(Subhash Ramakrishna Nakhle) । চি আৰ পি এফ জোৱান হিচাপে কৰ্মৰত হৈ থকা অৱস্থাত নাখলেই ছুটী বিচাৰি আবেদন জনাইছিল বিষয়াগৰাকীক । কিন্তু বিষয়াগৰাকীয়ে তেওঁৰ ছুটী মঞ্জুৰ কৰা নাছিল । খঙৰ ভমকত বিষয়াগৰাকীক গুলীয়াই হত্যা কৰে নাখলেই ।

সেই সময়ত মহাৰাষ্ট্ৰৰ আৰ্ভিৰ নাখলেই ত্ৰিপুৰাৰ কানচাম্পুৰৰ ৪৫ বেটেলিয়নত কৰ্মৰত হৈ আছিল । পৰিয়ালৰ এজন লোকৰ শেষকৃত্যত উপস্থিত থকাৰ বাবে নাখলেই ছুটী বিচাৰি আবেদন জনাইছিল । এই ঘটনা সংঘটিত হোৱাৰে পৰা পলাতক হৈ আছিল নাখলে ।

শেহতীয়াকৈ মহাৰাষ্ট্ৰৰ ৱাৰ্ধাৰ আৰক্ষীয়ে তেওঁক আটক কৰে । ভুৱা পৰিচয়েৰে বাস কৰি আছিল নাখলেই । যোৱা ২০ বছৰ ধৰি আৰক্ষীয়ে এই গোচৰ সন্দৰ্ভত বিশেষ অগ্ৰগতি লাভ কৰিবলৈ সক্ষম হোৱা নাছিল । ২০১২ চনত নাখলেই নিজৰ ঘৰলৈ গৈছিল আৰু তেতিয়া আৰক্ষীয়ে তেওঁৰ বিষয়ে তথ্য সংগ্ৰহ কৰিছিল ।

শেহতীয়াকৈ, সম্পত্তিৰ বিবাদ সংক্ৰান্তীয় কথাত নাখলেই পুনৰ তেওঁৰ গৃহ চহৰলৈ গৈছিল আৰু তেতিয়াই আৰক্ষীয়ে তেওঁক আটক কৰে । ইমান দিনে আৰক্ষীৰ চকুত ধূলি দি আত্মগোপন কৰি আছিল নাখলেই । অৱশেষত ২৯ বছৰৰ পাছত নাখলেই আৰক্ষীৰ জালত পৰিল ।

লগতে পঢ়ক:জম্মু-কাশ্মীৰৰ চাম্বাৰ আকাশত উৰিছে ৪ খন সন্দেহজনক ড্ৰোণ