নেশ্যনেল ডেস্ক, ২৩ জানুৱাৰী: পুণেৰ এখন আদালতে অহা ৩০ জানুৱাৰীত ছিৰাম ইনষ্টিটিউট অৱ ইণ্ডিয়াই প্ৰস্তুত কৰা প্ৰতিষেধকৰ নাম "ক'ভিশ্বিল্ড" ৰাখিব পাৰিবনে নাই সেই সন্দৰ্ভত নিৰ্দেশ জাৰি কৰিব । যোৱা ৪ জানুৱাৰীত কিউটিছ-বায়'টেকে ছিৰাম ইনষ্টিটিউট অৱ ইণ্ডিয়াক "ক'ভিশ্বিল্ড" অথবা আন যিকোনো একে ধৰণৰ নাম ব্যৱহাৰ কৰাৰ ক্ষেত্ৰত বাধা আৰোপ কৰিবলৈ আহ্বান জনাই ন্যায়ালয়ৰ দ্বাৰস্থ হৈছিল । কিউটিছ-বায়'টেকৰ মতে, "ক'ভিশ্বিল্ড" নামটো ব্যৱহাৰৰ ক্ষেত্ৰত তেওঁলোকে প্ৰাধান্য লাভ কৰা উচিত ।
একেটা নামকে ছিৰাম ইনষ্টিটিউট অৱ ইণ্ডিয়াই ব্যৱহাৰৰ অভিযোগ উত্থাপন কৰিছে কিউটিছ-বায়'টেকে । মঙলবাৰে ছিৰাম ইনষ্টিটিউট অৱ ইণ্ডিয়াই প্ৰতিক্ৰিয়া প্ৰকাশ কৰি কৈছিল যে, দুয়োটা ঔষধ নিৰ্মাণকাৰী প্ৰতিষ্ঠানে পৃথক ধৰণৰ সামগ্ৰী প্ৰস্তুত কৰে আৰু সেয়েহে ট্ৰেডমাৰ্কক লৈ বিভ্ৰান্তিৰ সৃষ্টি হোৱাৰ থল নাই । ছিৰাম ইনষ্টিটিউট অৱ ইণ্ডিয়াৰ পক্ষত থাকি অধিবক্তা এছ কে জৈনে কয় যে, শুকুৰবাৰে তেওঁ আদালতত যুক্তি দিছিল যে, কিউটিছ-বায়'টেকে বিগত বৰ্ষৰ ডিচেম্বৰ মাহত প্ৰতিষেধকৰ নাম হিচাপে "ক'ভিশ্বিল্ড" ব্যৱহাৰ কৰিবলৈ ট্ৰেডমাৰ্ক পঞ্জীয়কৰ ওচৰত আবেদন জনাইছিল ।