নেশ্যনেল, 5 নৱেম্বৰ: শেহতীয়াকৈ বানত বিধ্বস্ত হৈছে চেন্নাইৰ বহু অঞ্চল ৷ এই বানত আৱদ্ধ হৈ আছিল আন বহু লোকৰ দৰে বলীউডৰ অভিনেতা আমিৰ খানো । মঙলবাৰে ছ’চিয়েল মিডিয়াত শ্বেয়াৰ কৰা ফটোত তামিল অভিনেতা বিষ্ণু বিশাল আৰু অন্যান্য বানাক্ৰান্ত লোকৰ সৈতে এখন উদ্ধাৰকাৰী নাৱত বহি থকা দেখা গ’ল অভিনেতাগৰাকীক ৷
বিষ্ণু বিশালে পূৰ্বতে টুইটাৰ নামেৰে জনাজাত Xত এই ফটোসমূহ শ্বেয়াৰ কৰি অগ্নিনিৰ্বাপক আৰু উদ্ধাৰকাৰী দলক আৱদ্ধ লোকক সহায় কৰাৰ বাবে কৃতজ্ঞতা প্ৰকাশ কৰে । তেওঁ উল্লেখ কৰে যে ইতিমধ্যে কাৰাপাক্কামত উদ্ধাৰ অভিযান আৰম্ভ হৈছে আৰু তিনিখন নাৱে ফলপ্ৰসূভাৱে কাম কৰি আছে ।
এই বিপৰ্যয়ৰ সময়ছোৱাত তামিলনাডু চৰকাৰৰ উল্লেখযোগ্য প্ৰচেষ্টাক শলাগ লৈ অক্লান্তভাৱে কাম কৰি অহা সকলো প্ৰশাসনিক কৰ্মীক ধন্যবাদ জ্ঞাপন কৰে অভিনেতাগৰাকীয়ে ।
ইয়াৰ পূৰ্বে বিষ্ণুৱে শ্বেয়াৰ কৰিছিল যে তেওঁ চেন্নাইৰ বাসগৃহত বিদ্যুৎ বা নেটৱৰ্ক নোহোৱাকৈ আবদ্ধ হৈ আছে । তেওঁৰ ঘৰত পানী সোমোৱাৰ কথাও প্ৰকাশ কৰে । ধ্বংসলীলা প্ৰদৰ্শন কৰা ফটো শ্বেয়াৰ কৰাৰ সমান্তৰালভাৱে তেওঁ সহায়ৰ আশা প্ৰকাশ কৰে, কিয়নো কাৰাপাক্কামত পানীৰ স্তৰ আতংকজনকভাৱে বৃদ্ধি পাইছে ।