নেশ্যনেল ডেস্ক,1 ডিচেম্বৰ: উত্তৰ প্ৰদেশৰ দুজনকৈ ব্যক্তিৰ দেহত ধৰা পৰিছে কৰ’ণা ভাইৰাছৰ নতুন প্ৰবাহ ৷ উল্লেখ্য যে, কিছুদিন পূৰ্বে ইংলেণ্ডৰ পৰা প্ৰায় 1600 লোক উত্তৰ প্ৰদেশলৈ আহিছে ৷ ইয়াৰ পিছতেই কঠোৰ হৈ পৰিছে ৰাজ্যখনৰ স্বাস্থ্য বিভাগ ৷ ইংলেণ্ডৰ পৰা অহা যাত্ৰীসকলৰ দেহত কৰ’ণাৰ লক্ষ্যণ ধৰা পৰিলে তেওঁলোকক তাৎক্ষণিকভাৱে আইছোলেশ্যনত থাকিবলৈ নিৰ্দেশ দিছে স্বাস্থ্য বিভাগে ৷ কৰ’ণাত আক্ৰান্ত ৰোগীসকলক চৰকাৰী হাস্পতালত স্থাপন কৰা বিশেষ ৱাৰ্ডত ভৰ্তি কৰোৱা হ’ব ৷ ব্ৰিটেইনৰ পৰা অহা এইসকল লোকৰ কোনোৱে কৰ’ণা ভাইৰাছত আক্ৰান্ত হ’লে তেওঁলোকৰ আইছোলেশ্যনৰ সময় 28 দিন হ’ব ৷
ইংলেণ্ডৰ পৰা অহা 1600 যাত্ৰীৰ 300 লোকক এইপৰ্যন্ত বিচাৰি উলিয়াবলৈ সক্ষম হোৱা নাই স্বাস্থ্য বিভাগে ৷ কেন্দ্ৰীয় চৰকাৰৰ পৰা লাভ কৰা তথ্য আৰু ঠিকনাৰ ভিত্তিত এই লোকসকলক বিচৰা হৈছে যদিও তেওঁলোক নিজৰ ঠিকনাত উপস্থিত নাই নতুবা এইলোকসকলৰ সৈতে ফোনত সংযোগ স্থাপন কৰিবলৈ সক্ষম হোৱা নাই ৷ এই ক্ষেত্ৰত উপায়ন্তৰ হৈ উত্তৰ প্ৰদেশ চৰকাৰে ঘোষণা কৰিছে যে, যিসকল লোক স্বেচ্ছাই আগবাঢ়ি অহা নাই তেওঁলোকৰ বিৰুদ্ধে দুৰ্যোগ আইনৰ অধীনত এফ আই আৰ ৰুজু কৰা হ’ব ৷