নতুন দিল্লী,02 জুন : বৈদেশিক পৰিক্ৰমা মন্ত্ৰণালয়ৰ দায়িত্ব গ্ৰহণ কৰাৰ পাচতেই যথেষ্ট সক্ৰিয় ৰূপত দেখা গ'ল মন্ত্ৰী এচ জয়শংকৰক ৷ পূৰ্বৰ বৈদেশিক পৰিক্ৰমা মন্ত্ৰী সুষমা স্বৰাজৰ দৰেই ছ'চিয়েল মিডিয়াৰ জৰিয়তে সহায় বিচৰাসকলক সহায়ৰ প্ৰতিশ্ৰুতি প্ৰদান কৰিলে মন্ত্ৰীগৰাকীয়ে ৷
কেন্দ্ৰীয় মন্ত্ৰীগৰকীয়ে দায়িত্ব গ্ৰহণ কৰাৰ পাচত শনিবাৰে ৰিংকী নামৰ এগৰাকী মহিলাই ছ'চিয়েল মিডিয়াত মন্ত্ৰীগৰাকীৰ পৰা সহায় বিচাৰে ৷ বৰ্তমান ভাৰতত বসবাস কৰা মহিলাগৰাকীয়ে কয় বিগত ছয়মাহ ধৰি আমেৰিকাত থকা তেওঁৰ দুবছৰীয়া কন্যাক উভতাই আনিবলৈ চেষ্টা চলাই আহিছে ৷ এই ক্ষেত্ৰত তেওঁ বৈদেশিক পৰিক্ৰমা মন্ত্ৰণালয়ৰ পৰা সহায় বিচাৰে ৷ মন্ত্ৰীগৰাকীয়ে ছ'চিয়েল মিডিয়াত মহিলাগৰাকীক আমেৰিকাত থকা ভাৰতীয় দূতাবাসে সহায় কৰিব বুলি উত্তৰ দিয়ে ৷