হিন্দু লোকৰ শেষকৃত্য সম্পন্ন কৰি মানৱতাৰ নিদৰ্শন একাংশ মুছলমান লোকৰ

ৰাজস্থানৰ জয়পুৰৰ মুছলমান সম্প্ৰদায়ৰ একাংশ লোকে দাঙি ধৰিলে মানৱীয়তাৰ উৎকৃষ্ট নিদৰ্শন । আত্মীয় লোকৰ অনুপস্থিতিত এগৰাকী হিন্দু লোকৰ শেষকৃত্য সম্পন্ন কৰিলে একাংশ মুছলমান সম্প্ৰদায়ৰ লোকে ।

নেশ্যনেল ডেস্ক, 14 এপ্ৰিলঃ কৰ'ণা ভাইৰাছৰ ত্ৰাসে সমগ্ৰ মানৱ জাতিলৈ এক অভূতপূৰ্ব প্ৰত্যাহ্বানৰ সৃষ্টি কৰিছে, যদিও কোনো কোনো ক্ষেত্ৰত ই মানুহে মানুহৰ বাবে ঠিয় হৈ সহায়ৰ বাবে আগবাঢ়ি অহাৰো সুযোগ প্ৰদান কৰিছে । তাৰেই উদাহৰণ বহন কৰিছে ৰাজস্থানৰ জয়পুৰৰ মুছলমান সম্প্ৰদায়ৰ একাংশ লোকে । জয়পুৰৰ একাংশ মুছলমান সম্প্ৰদায়ৰ লোকে এনে কঠিন সময়ত দাঙি ধৰিলে সামুহিক ঐক্যতাৰ নিদৰ্শন ।

COVID-19ৰ সংক্ৰমণৰ শংকাত কৰ্কট ৰোগত আক্ৰান্ত হৈ মৃত্যু হোৱা এগৰাকী হিন্দু লোকৰ শেষকৃত্য সম্পন্ন কৰিবলৈ অস্বীকাৰ কৰে তেওঁলোকৰ আত্মীয়ই । তেনেস্থলত মৃত লোকগৰাকীৰ চুবুৰীয়া একাংশ মুছলমান লোকে, সম্পূৰ্ণ হিন্দু ৰীতি-নীতিৰে মৃতদেহৰ শেষকৃত্য সম্পন্ন কৰে ।

জয়পুৰৰ অন্তৰ্গত বজৰঙ্গ নগৰৰ ভট্ট বস্তিত বাস কৰিছিল ৰাজেন্দ্ৰ নামৰ লোকগৰাকী । তেওঁ কৰ্কট ৰোগত আক্ৰান্ত হৈ আছিল আৰু জয়পুৰৰ এখন চৰকাৰী চিকিৎসালয়ত তেওঁৰ চিকিৎসা চলি আছিল । কিন্তু সোমবাৰে ৰাজেন্দ্ৰ নামৰ লোকগৰাকীয়ে মৃত্যুক সাৱটি লয় ।

কিন্তু, তেওঁৰ মৃতদেহ সৎকাৰ এক প্ৰত্যাহ্বান হৈ পৰে । কিয়নো তেওঁৰ পৰিয়ালত কোনো পুৰুষ সদস্য নাছিল আৰু তেওঁৰ আন কোনো আত্মীয়ই লক্ ডাউনৰ ফলত তেওঁৰ অন্তিম সংস্কাৰৰ বাবে জয়পুৰলৈ যাব পৰা নাছিল । লগতে কৰ'ণা ভাইৰাছৰ শংকাও তেওঁলোকৰ মনত বিদ্যমান আছিল । তেওঁলোকৰ আশে-পাশে কোনো হিন্দু লোক নথকাৰ বাবে মুছলমান চুবুৰীয়াসকলেই, আন কেইগৰাকীমান মুছলমান লোকৰ সহযোগত মৃত লোকগৰাকীৰ অন্তিম সৎকাৰ কৰে ।

সেই অঞ্চলত থকা সকলো মুছলমান সম্প্ৰদায়ৰ লোক আহি মৃতদেহটো সৎকাৰ বাবে প্ৰস্তুত কৰি শ্মশানলৈ নি তেওঁৰ অন্ত্যেষ্টিক্ৰিয়া সম্পন্ন কৰে । পাপু কুৰেশ্বি নামৰ এগৰাকী চুবুৰীয়া লোকে তেওঁলোকৰ এই কাৰ্যক ৰাজনৈতিক স্বাৰ্থৰ বাবে সাম্প্ৰদায়িক ভেদাভেদৰ সৃষ্টি কৰা লোকসকলৰ বাবে এক উৎকৃষ্ট নিদৰ্শন বুলি উল্লেখ কৰে ।

লগতে পঢ়কঃকাৰ বিৰুদ্ধে যুঁজিব ভাৰতে : কৰ’ণা নে পাকিস্তান ?