নেশ্যনেল ডেস্ক, 28 নৱেম্বৰ :শনিবাৰে সামুদ্ৰিক নিৰাপত্তা সন্দৰ্ভত ভাৰত, শ্ৰীলংকা আৰু মালদ্বীপৰ মাজত অনুষ্ঠিত হৈছে এক ত্ৰিদেশীয় বৈঠক ৷ ভাৰতীয় উচ্চায়ুক্তই জানিবলৈ দিয়ে এই কথা ৷ এই বৈঠকৰ মুখ্য অতিথি হিচাপে উপস্থিত থাকে শ্ৰীলংকাৰ বৈদেশিক মন্ত্ৰী দিনেশ গুনাৱৰ্ধনে ৷
এই বৈঠকত ভাৰতক প্ৰতিনিধিত্ব কৰা ৰাষ্ট্ৰীয় প্ৰতিৰক্ষা উপদেষ্টা অজিত ডোভাল শুকুৰবাৰে শ্ৰীলংকাত উপস্থিত হয় ৷ আনহাতে, এই বৈঠকত মালদ্বীপক বৈদেশিক মন্ত্ৰী মাৰিয়া দিদি আৰু শ্ৰীলংকাক প্ৰতিৰক্ষা সচিব মেজৰ জেনেৰেল অৱসৰপ্ৰাপ্ত কমল গুনাৰত্নেই প্ৰতিনিধিত্ব কৰে ৷
ভাৰতীয় উচ্চায়ুক্তই টুইটাৰৰ জৰিয়তে কয়, "ভাৰত, শ্ৰীলংকা আৰু মালদ্বীপৰ মাজত সামুদ্ৰিক আৰু নিৰাপত্তা সহযোগিতা সম্পৰ্কীয় ত্ৰিদেশীয় বৈঠকৰ আৰম্ভণি হৈছে ৷ মন্ত্ৰী @DCRGunawardena এই বৈঠকৰ মুখ্য অতিথি ৷" উল্লেখ্য যে, এয়া সামুদ্ৰিক নিৰাপত্তা সহযোগিতা সম্পৰ্কত প্ৰথমখন ৰাষ্ট্ৰীয় প্ৰতিৰক্ষা উপদেষ্টা (NSA) পৰ্যায়ৰ বৈঠক ৷
বৈদেশিক মন্ত্ৰণালয়ে মন্তব্য কৰে যে, NSA পৰ্যায়ৰ এই ত্ৰিদেশীয় বৈঠকে ভাৰত মহাসাগৰৰ দেশসমূহৰ মাজত সহযোগিতাৰ বাবে এক ফলপ্ৰসূ মঞ্চ প্ৰদান কৰিব ৷ ছয়বছৰৰ অন্তত এই বৈঠকক এক নতুন ৰূপ প্ৰদান কৰা হৈছে ৷ পূৰ্বে 2011 চনত মালদ্বীপ, 2013 চনত শ্ৰীলংকা আৰু 2014 চনত ভাৰতত আয়োজন কৰা হৈছিল সামুদ্ৰিক নিৰাপত্তা সম্পৰ্কীয় বৈঠক ৷
লগতে পঢ়ক :ছোমালিয়াত আত্মঘাতী বোমা আক্ৰমণত নিহত সাত
