ট্ৰাক দুৰ্ঘটনাত নিহত পাঁচ প্ৰৱজিত শ্ৰমিক, আহত 11

মধ্যপ্ৰদেশৰ নৰসিংপুৰত ট্ৰাক দুৰ্ঘটনাত নিহত পাঁচ প্ৰব্ৰজনকাৰী শ্ৰমিক ৷ আনহাতে, আহত হৈছে 11 জন ৷

নেশ্যনেল ডেস্ক, 10 মে' : মধ্যপ্ৰদেশৰ নৰসিংপুৰত শনিবাৰে এক ভয়ংকৰ পথ দূৰ্ঘটনাত নিহত হয় পাঁচ প্ৰব্ৰজনকাৰী শ্ৰমিক আৰু আহত হয় 11 জন ৷ তথ্য অনুসৰি, উত্তৰ প্ৰদেশলৈ হাইদৰাবাদৰ পৰা এখন ট্ৰাকেৰে আহি আছিল এই শ্ৰমিকসকল ৷ হাইদৰাবাদৰ পৰা আগ্ৰা অভিমুখী ট্ৰাকখনত 18 জনকৈ লোক থকাৰ লগতে কঢ়িয়াই অনা হৈছিল আম ৷

নৰসিংপুৰৰ কালেক্টৰ দিপক চাক্সেনাই কয়, "আম ভৰ্তি ট্ৰাকখন হাইদৰাবাদৰ পৰা আগ্ৰা অভিমুখে গৈ আছিল ৷ 2 জন ড্ৰাইভাৰ আৰু এজন কনডাক্টৰ সহ মুঠ 18 জন মানুহ ট্ৰাকখনত আছিল ৷ 18 জনৰে 5 জনৰ মৃত্যু হৈছে ৷"

আহতসকলৰ দুজনক সংকটজনক অৱস্থাত জবলপুৰলৈ উন্নত চিকিৎসাৰ বাবে প্ৰেৰণ কৰা হৈছে ৷ ইয়াৰে এজন তিনিদিন ধৰি কাঁহ আৰু জ্বৰত আক্ৰান্ত হৈ আছে ৷ সেয়েহে আহত কেইজনৰ লগতে মৃত লোক কেইজনৰো নমুনা সংগ্ৰহ কৰি কৰ'ণা ভাইৰাছ পৰীক্ষাৰ বাবে প্ৰেৰণ কৰা হৈছে ৷

উল্লেখ্য যে, মহাৰাষ্ট্ৰৰ ঔৰংগাবাদত শনিবাৰে পুৱতি নিশা 16 জনকৈ প্ৰব্ৰজনকাৰী শ্ৰমিকক ট্ৰেইনে মহতিয়াই নিয়াত আটাইকেইজনৰে থিতাতে মৃত্যু হৈছিল ৷