ভাৰত-চীন সীমান্তত উদ্বিগ্নতা সম্পৰ্কত কেন্দ্ৰক সমালোচনা কংগ্ৰেছৰ

প্ৰকৃত নিয়ন্ত্ৰণ ৰেখাত ভাৰত-চীন সীমান্তৰ শেহতীয়া পৰিস্থিতি সম্পৰ্কত সংসদত শাসনাধীষ্ঠ বিজেপি দলক উভতি ধৰিছে কংগ্ৰেছ দলে ৷ প্ৰতিৰক্ষা মন্ত্ৰী ৰাজনাথ সিঙে সংসদত সীমান্ত সম্পৰ্কত এক মন্তব্য কৰাৰ পাচতে বিজেপি দলক আক্ৰমণ কৰে কংগ্ৰেছে ৷

নেশ্যনেল ডেস্ক, 15 ছেপ্তেম্বৰ : প্ৰকৃত নিয়ন্ত্ৰণ ৰেখাত ভাৰত-চীন সীমান্তৰ শেহতীয়া পৰিস্থিতি সম্পৰ্কত সংসদত শাসনাধীষ্ঠ বিজেপি দলক উভতি ধৰিছে কংগ্ৰেছ দলে ৷ প্ৰতিৰক্ষা মন্ত্ৰী ৰাজনাথ সিঙে সংসদত সীমান্ত সম্পৰ্কত এক মন্তব্য কৰাৰ পাচতে বিজেপি দলক আক্ৰমণ কৰে কংগ্ৰেছে ৷ কংগ্ৰেছে মন্তব্য কৰে যে, ভাৰত-চীন সীমান্ত সম্পৰ্কত প্ৰশ্ন কৰাত বিৰোধী দলক বাকৰুদ্ধ কৰিবলৈ কেন্দ্ৰই চেষ্টা চলাইছে ৷

মঙলাবাৰে সংসদত প্ৰধানমন্ত্ৰী নৰেন্দ্ৰ মোডীৰ অনুপস্থিতি সম্পৰ্কতো প্ৰশ্ন উত্থাপন কৰে কংগ্ৰেছ নেতা ৰাহুল গান্ধীয়ে ৷ হিন্দী ভাষাত টুইটাৰৰ জৰিয়তে ৰাহুলে লিখে, "প্ৰতিৰক্ষা মন্ত্ৰীৰ মন্তব্যৰ পৰা এই কথা স্পষ্ট যে, চীনৰ বেদখল সম্পৰ্কত প্ৰধানমন্ত্ৰী মোডীয়ে দেশবাসীক ভুল তথ্য প্ৰদান কৰিছে ৷ আমাৰ দেশ সদায়ে ভাৰতীয় সেনাৰ সৈতে থিয় দি আছে আৰু থাকিব ৷ কিন্তু প্ৰধানমন্ত্ৰী মোডী আপুনি কেতিয়া চীনৰ বিৰুদ্ধে বিদ্ৰোহ ঘোষণা কৰিব ? কেতিয়া চীনৰ পৰা আমাৰ মাটি উভতাই আনিব ?"

ভাৰত-চীন সীমান্ত সম্পৰ্কীয় প্ৰশ্ন নাকচ কৰা বাবে কংগ্ৰেছৰ সাংসদসকলে লোকসভা কক্ষৰ পৰা ওলাই আহি এক প্ৰতিবাদো সাব্যস্ত কৰে ৷ বিৰোধী দলটোৱে কয় যে, চৰকাৰে কঠিন প্ৰশ্নৰ পৰা নিজকে আঁতৰাই ৰাখিছে ৷

সংবাদ মাধ্যমৰ আগত কংগ্ৰেছ নেতা অধিৰ ৰঞ্জন চৌধুৰীয়ে কয়, "1962 ৰ যুদ্ধৰ সময়ত ভাৰত-চীন সীমান্ত বিবাদ সম্পৰ্কত অটল বিহাৰী বাজপেয়ীয়ে প্ৰশ্ন উত্থাপন কৰাত সেই সময়ৰ প্ৰধানমন্ত্ৰী জৱাহৰলাল নেহেৰুয়ে সংসদত দুদিনীয়া আলোচনাৰ আয়োজন কৰিবলৈ সন্মতি প্ৰদান কৰিছিল ৷"

কংগ্ৰেছৰ উপ-নেতা গৌৰৱ গগৈয়ে লোকসভাত কয়, "আজি আমি এক প্ৰতিবাদ সাব্যস্ত কৰিবৰ বাবে ওলাই আহিছো ৷ ভাৰতীয় সেনাৰ সমৰ্থনত আমাৰ নেতা অধিৰ ৰঞ্জন চৌধুৰীয়ে এক বাৰ্তা প্ৰেৰণ কৰিব বিচাৰিছিল যদিও তেওঁৰ আহ্বানক নুই কৰা হয় ৷ কিন্তু চৰকাৰে ভাবে যে, তেওঁলোকেহে ভাৰতীয় সেনাৰ সমৰ্থনত থিয় দিয়ে ৷"

কংগ্ৰেছ সাংসদ শশী থাৰুৰে কেন্দ্ৰক আক্ৰমণ কৰি টুইটাৰৰ জৰিয়তে কয়, "আন এক প্ৰশ্ন, LAC সম্পৰ্কত দুয়ো দেশে বৈঠকত মিলিত হ'ব বুলি প্ৰতিৰক্ষা মন্ত্ৰীয়ে মন্তব্য কৰিছিল ৷ কিন্তু পৃথকে তেওঁ এয়াও মন্তব্য কৰিছিল যে, প্ৰকৃত নিয়ন্ত্ৰণ ৰেখা সন্দৰ্ভত দুয়ো দেশৰ দৃষ্টিভংগী পৃথক ৷ এয়া অন্য এক সংঘৰ্ষৰ আৰম্ভণি নহয়নে ?"

লগতে পঢ়ক :অবধ আসাম এক্সপ্ৰেছত মানৱ সৰবৰাহকাৰীৰ কৱলৰ পৰা উদ্ধাৰ 6 শিশু