মুম্বাই ৰে'লসেৱা বাতিল সন্দৰ্ভত মুখ্যমন্ত্ৰী উদ্ধৱ থাকৰেৰ বৈঠক

মুম্বাইৰ ৰে'লসেৱা বাতিল সম্পৰ্কত মঙলবাৰে মুখ্যমন্ত্ৰী থাকৰেৰ সিদ্ধান্ত গ্ৰহণ ৷ এক কেবিনেট বৈঠকত গ্ৰহণ কৰা হ'ব সিদ্ধান্ত ৷

নেশ্যনেল ডেস্ক, 17 মাৰ্চ : মুম্বাইৰ ৰে'লসেৱা কিছুদিনৰ বাবে বাতিল সম্পৰ্কত সিদ্ধান্ত গ্ৰহণ কৰিব মহাৰাষ্ট্ৰৰ মুখ্যমন্ত্ৰী উদ্ধৱ থাকৰেই ৷ কৰ'ণাভাইৰাছ প্ৰতিৰোধৰ বাবে জনসমাগমত প্ৰতিবন্ধকতা লগোৱাৰ উদ্দেশ্যে এই ব্যৱস্থা গ্ৰহণ কৰা হ'ব বুলি মঙলবাৰে মন্তব্য আগবঢ়ায় ৰাজ্যখনৰ স্বাস্থ্যমন্ত্ৰী ৰাজেশ টোপে ৷ ৰাজ্যিক কেবিনেটৰ বৈঠকত বিয়লি ভাগত এই সম্পৰ্কত সিদ্ধান্ত গ্ৰহণ কৰাৰ সম্ভাৱনা আছে ৷

উপনগৰীয় ৰে'লৰ উপৰি মুম্বাই মেট্ৰ' ৰে'ল, মন' ৰে'ল আৰু অন্যান্য পৰিৱহণ সেৱা সম্পৰ্কতো এই সিদ্ধান্ত গ্ৰহণ কৰা হ'ব ৷ ইয়াৰ ফলত দেশৰ অন্যতম বৃহৎ মহানগৰখনত যান-বাহন ব্যৱস্থাত জটিলতা অহাৰ সম্ভাৱনা আছে ৷

টোপে লগতে কয়, "আমাৰ হাতত বিকল্প ব্যৱস্থা আছে - ৰে'লৰ সকলো দবা পৰিস্কাৰ কৰি ৰখা, যাত্ৰীৰ সংখ্যা কম কৰা আদিও কৰিব পৰা যাব ৷ ৰে'লসেৱা বাতিল কৰাৰ পৰিৱৰ্তে এই সিদ্ধান্ত গ্ৰহণ কৰিব পৰা যায় ৷"

মুম্বাই, থানে, পালঘৰ আৰু ৰাইগড় জিলাত সেৱা আগবঢ়োৱা কেন্দ্ৰীয় ৰে'ল সেৱা, পশ্চিম ৰে'লসেৱাৰ জৰিয়তে প্ৰায় 8.50 মিলিয়ন লোক প্ৰতিদিনে ভ্ৰমণ কৰে ৷

উল্লেখ্য যে, মহাৰাষ্ট্ৰত বৰ্তমানলৈকে 38 জন লোক কৰ'ণাভাইৰাছত আক্ৰান্ত হোৱাৰ লগতে 64 বৰ্ষীয় এজন লোকে মৃত্যুক সাৱটি লৈছে ৷

আৰু পঢ়ক : ৰাজ্যসভাৰ সদস্য পদ : শপত গ্ৰহণৰ পাচতহে জনাব ন্যায়াধীশ ৰঞ্জন গগৈয়ে !