আছু আৰু নেছ'ৱে অব্যাহত ৰাখিব নাগৰিকত্ব সংশোধনী আইন বিৰোধী আন্দোলন

আছু আৰু নেছ'ৱে নাগৰিকত্ব সংশোধনী আইন বিৰোধী আন্দোলন অব্যাহত ৰাখিব বুলি মন্তব্য কৰিছে ৷ উচ্চতম ন্যায়ালয়ত বুধবাৰে 59 খন আবেদনৰ শুনানি গ্ৰহণ কৰে ৷

নেশ্যনেল ডেস্ক, 18 ডিচেম্বৰ : সদৌ অসম ছাত্ৰ সংগঠন (আছু) আৰু উত্তৰ-পূৱ ছাত্ৰ সংগঠন (নেছ')য়ে বুধবাৰে নাগৰিকত্ব সংশোধনী আইন বিৰোধী আন্দোলন অব্যাহত ৰাখিবলৈ প্ৰতিজ্ঞাবদ্ধ বুলি মন্তব্য কৰে ৷ আছুৰ সভাপতি দিপাংক কুমাৰ নাথে ইটিভি ভাৰতক প্ৰদান কৰা এক সাক্ষাৎকাৰত কয়, "এই আইনৰ বিৰুদ্ধে আমি আন্দোলন অব্যাহত ৰাখিম ৷ চৰকাৰে আমাৰ ওপৰত জোৰকৈ কোনো বস্তু জাপি দিব নোৱাৰে ৷ উচ্চতম ন্যায়ালয়ে আজি প্ৰদান কৰা নিৰ্দেশনা আমাৰ বাবে এক জয় ৷ এই আইনৰ আঁৰত থকা সঁচা অভিসন্ধি জানিবৰ বাবে চৰকাৰক নিৰ্দেশ প্ৰদান কৰিছে উচ্চতম ন্যায়ালয়ে ৷"

উল্লেখ্য যে,উচ্চতম ন্যায়ালয়ত বুধবাৰে 59 খন আবেদনৰ শুনানি গ্ৰহণ কৰা হয় ৷ নতুন আইনখন বাতিলকৰণৰ সন্দৰ্ভত যি স্থগিতাদেশৰ আবেদন জনোৱা হৈছিল সেই আবেদন সৰ্বোচ্চ ন্যায়ালয়ে খাৰিজ কৰিছে ৷

মুখ্য ন্যায়াধীশ এছ.এ. ববডেৰ নেতৃত্বত গঠিত বি.আৰ.গাভাইন আৰু সূৰ্য কান্তৰ বিচাৰক মণ্ডলীয়ে 22 জানুৱাৰীত পুনৰ গোচৰৰ পৰৱৰ্তী শুনানি গ্ৰহণ কৰিব ৷

গুৱাহাটীৰ সন্দিকৈ মহাবিদ্যালয়ৰ অৱসৰপ্ৰাপ্ত প্ৰৱক্তা বসন্ত ডেকাই লগতে কয়, "আমি আশা কৰিছো যে,ন্যায়ালয়ে আমাৰ সপক্ষে ৰায়দান কৰিব ৷ এই আইনখনে ঐতিহাসিক অসম চুক্তিৰ মূল দফা উলংঘা কৰিছে ৷ " উল্লেখ্য যে,নাগৰিকত্ব সংশোধনী আইনৰ বিৰুদ্ধে আৰম্ভ হোৱা আন্দোলনৰ সৈতে জড়িত আছে বসন্ত ডেকা ৷

অসম সাহিত্য সভাৰ সাধাৰণ সম্পাদক পদুম ৰাজখোৱাই ন্যায়ালয়ৰ নিৰ্দেশনা সম্পৰ্কে মন্তব্য কৰি কয় যে,এই আইনে অসমৰ খিলঞ্জীয়া লোকক অসমতে সংখ্যালঘু কৰি তুলিব ৷

"আইনখন মানৱ বিৰোধী ৷ এই আইন অসমত কাৰ্যকৰী কৰিবলৈ চৰকাৰক দিয়া নহ'ব ৷ আমাৰ আন্দোলন আমি অব্যাহত ৰাখিম"- ৰাজখোৱা ৷

আৰু পঢ়ক : উচ্চতম ন্যায়ালয়ত অধিবক্তাৰ ৰূপত তৰুণ গগৈ