চেন্নাইত হোৱা এমোনিয়া গেছ নিৰ্গমনৰ ফলত প্ৰায় অৰ্ধশতাধিক লোক বৰ্তমানেও চিকিৎসাধীন

উত্তৰ চেন্নাইৰ এন্নোৰৰ(chennai gas leak) এটা সাৰ কাৰখানাৰ পৰা এমোনিয়া গেছ নিৰ্গত হোৱাৰ(ammonia gas leak) ফলত প্ৰায় অৰ্ধশতাধিক লোক চিকিৎসাধীন হৈছে ৷ শিশুসহ প্ৰায় 52 জনকৈ লোকক চিকিৎসালয়ত বৰ্তমানেও ভৰ্তি হৈ আছে বুলি জানিব পৰা গৈছে ৷

নিউজ ডেস্ক, 28 ডিচেম্বৰ:অভিশপ্ত ভূপাল গেছ দুৰ্ঘটনাৰ ভয়াবহ কাহিনী নিশ্চয় আপুনিও শুনিছে ৷ ঠিক তেনে অনুৰূপ ঘটনাৰ পৰা ৰক্ষা পৰিল চেন্নাই ৷ কাৰণ, বুধবাৰে উত্তৰ চেন্নাইৰ এন্নোৰৰ এটা সাৰ কাৰখানাৰ পৰা নিৰ্গত হৈছিল বিষাক্ত এমোনিয়া গেছ ৷

বুধবাৰে উত্তৰ চেন্নাইৰ এন্নোৰৰ এটা সাৰ কাৰখানাৰ পৰা এমোনিয়া গেছ নিৰ্গত হোৱাৰ ফলত বৰ্তমানলৈকে প্ৰায় অৰ্ধশতাধিক লোকক চিকিৎসালয়ত ভৰ্তি কৰোৱা হৈছে বুলি জানিব পৰা গৈছে ৷ উল্লেখ্য যে, 26 ডিচেম্বৰত নিশা সাৰ কাৰখানাৰটোৰ পৰা এমোনিয়া গেছ নিৰ্গত হৈছিল ৷

এমোনিয়া গেছ নিৰ্গত হোৱাৰ ফলত স্থানীয় বাসিন্দাসকলৰ উশাহ চুটি হোৱা আৰু বমি দৰে লক্ষণে দেখা দিয়ে ৷ ফলত বৰ্তমান পৰ্যন্ত 52 জনকৈ লোকক চিকিৎসালয়ত ভৰ্তি কৰোৱা হৈছে ৷ আনহাতে, সমগ্ৰ ঘটনাৰ সন্দৰ্ভত তদন্ত কৰিবলৈ এক বিশেষজ্ঞৰ দল গঠন কৰা হৈছে ৷ 24 ঘন্টাৰ ভিতৰত তদন্তৰ প্ৰতিবেদন দাখিল কৰিবলৈ বিশেষজ্ঞৰ দলটোক নিৰ্দেশ দিছে চৰকাৰে ৷

ঘটনাৰ সন্দৰ্ভত এক চৰকাৰী প্ৰেছ বিজ্ঞপ্তিত কোৱা হৈছে যে, 20 মিনিটৰ ভিতৰত বিশেষজ্ঞসকলে গেছ নিৰ্গত বন্ধ কৰিবলৈ সক্ষম হৈছিল ৷ বৰ্তমান কোনো এমোনিয়া গোেছ নিৰ্গত হোৱা নাই বুলিও প্ৰেছ বিজ্ঞপ্তিত কোৱা হৈছে । টি এন পি চি বিয়ে সাৰ কাৰখানাৰটোৰ কাৰ্যকলাপ তৎক্ষণাৎ স্থগিত ৰখাৰ নিৰ্দেশ দিছিল।

উল্লেখ্য যে, 26 ডিচেম্বৰৰ নিশা প্ৰায় 11.45 বজাত গেছ নিৰ্গত হৈছিল ৷ মাজনিশা সমুদ্ৰৰ সমীপত থকা কিছুমান মাছমৰীয়া আৰু স্থানীয় বাসিন্দাই অস্বাভাৱিক শব্দ শুনা পাইছিল ৷ তাৰ পাচত উত্তৰ চেন্নাই অঞ্চলৰ দুৰ্গন্ধ বিয়পি পৰে, যাৰ ফলত কেইবাজনো ব্যক্তিয়ে চকু, ডিঙি আৰু বুকুত জ্বলা-পোৰা অনুভৱ হোৱাৰ লগতে মূৰ্ছা গৈছিল । শুই থকা লোকসকল আতংকিত হৈ তেওঁলোকৰ ঘৰৰ পৰা ওলাই আহিছিল বুলি স্থানীয় ৰাইজে সংবাদ মাধ্যমৰ আগত মন্তব্য কৰে ৷

লগতে পঢ়ক :চেন্নাই সাৰ কাৰখানাত এমোনিয়া গেছ নিৰ্গমন; চিকিৎসালয়ত ভৰ্তি কেইবাজনো