ডিব্ৰুগড়,৫ অক্টোবৰ : ডিব্ৰুগড় নৃশংস ঘটনা । জন্মদাত্ৰী মাতৃক নৃশংসভাৱে হত্যা যুৱকৰ । প্ৰথমে অমানুষিক অত্যাচাৰ আৰু তাৰ পিছত মাতৃক ডিঙি চেপি হত্যা । ডিব্ৰুগড়ৰ বাণীপুৰত সংঘটিত হৈছে এই ঘটনা । ঘৰৰ ভিতৰতে মাতৃক হত্যা কৰাৰ অভিযোগ উঠিছে ।
ঘটনাৰ পাছত নিশাই গাভৰুপথাৰ থানাৰ আৰক্ষী উপস্থিত হৈ মাতৃৰ মৃতদেহ উদ্ধাৰ কৰে । লগতে অভিযুক্ত হত্যাকাৰী পুত্ৰক আৰক্ষীয়ে গ্ৰেপ্তাৰ কৰে । জানিব পৰা মতে ঘৰটোত কেৱল মাতৃ আৰু তেওঁ পুত্ৰই বাস কৰি আছিল । অভিযোগ অনুসৰি শুকুৰবাৰে নিশা পুত্ৰই মাতৃৰ ওপৰত শাৰীৰিক নিৰ্যাতন চলাই আৰু ডিঙি চেপি হত্যা কৰে । এই ঘটনা পোহৰলৈ অহা লগে লগে ডিব্ৰুগড়ত তীব্ৰ চাঞ্চল্যৰ সৃষ্টি হৈছে ।
কুলাংগাৰ পুত্ৰৰ হাতত প্ৰাণ গ'ল মহিলাৰ (ETV Bharat) লাহোৱালত মহিলাৰ মৃতদেহ উদ্ধাৰ :
বাণীপুৰৰ ঘটনাৰ সমান্তৰালকৈ লাহোৱালত এগৰাকী মহিলাৰ মৃতদেহ উদ্ধাৰক লৈ তীব্ৰ চাঞ্চল্যৰ সৃষ্টি হৈছে । লাহোৱালৰ ১ নং চিৰিংহোলাত এটা ৰাজহুৱা পুখুৰীত উদ্ধাৰ হয় মহিলাগৰাকীৰ মৃতদেহ । মৃত মহিলাগৰাকী টিনা কুজুৰ ওৰাং বুলি জানিব পৰা গৈছে । ঘোঁৰামৰা আৰক্ষী উপস্থিত হৈ মৃতদেহটো উদ্ধাৰ কৰি মৰণোত্তৰ পৰীক্ষাৰ বাবে প্ৰেৰণ কৰিছে । লগতে ঘটনাৰ তদন্তও আৰম্ভ কৰিছে । এয়া আত্মহত্যা নে হত্যা, তাক লৈ ৰহস্য অব্যাহত আছে ।
ডিকমত অচিনাক্ত যুৱকৰ মৃতদেহ উদ্ধাৰ :
ইফালে ডিব্ৰুগড়ৰ ডিকমৰ ৩৭ নং ৰাষ্ট্ৰীয় ঘাইপথৰ সমীপত এজন যুৱকৰ মৃতদেহ উদ্ধাৰ হয় । ডিকম মছজিদৰ নিচেই কাষতে যুৱকজনৰ মৃতদেহ উদ্ধাৰ হোৱাক লৈ অঞ্চলজুৰি তীব্ৰ চাঞ্চল্যৰ সৃষ্টি হৈছে । পথৰ সমীপৰ জংঘলত উদ্ধাৰ হয় মৃতদেহটো । অৱশ্যে যুৱকজনৰ পৰিচয় জানিব পৰা হোৱা নাই । ডিকম আৰু লাহোৱাল আৰক্ষী ঘটনাস্থলীত উপস্থিত হৈ তদন্ত আৰম্ভ কৰিছে ।
লগতে পঢ়ক :হত্যাকাৰী বাঘ ক'ত ? কেতিয়া যাব চিৰিয়াখানালৈ ? - TIGER ATTACK IN ORANG NATIONAL PARK
