বন্যহস্তীৰ দেহত ৰেডিঅ' ক'লাৰ স্থাপন, জানিব পৰা যাব হাতীৰ জাকৰ গতিবিধি

বনৰীয়া হাতীৰ জাকৰ দলপতি হাতীটোৰ গাত এই অত্যাধুনিক যন্ত্ৰ স্থাপন কৰি উপগ্ৰহৰ যোগেদি দলটোৰ গতি-বিধি লক্ষ্য কৰিব পৰা যাব ৷

গুৱাহাটী: ৰাজ্যৰ হাতী-মানুহৰ সংঘাতৰ ভয়াৱহ ৰূপৰ মাজতে বনৰীয়া হাতীৰ গতি-বিধি নিৰীক্ষণৰ বাবে ভাৰত চৰকাৰ আৰু অসম চৰকাৰে গ্ৰহণ কৰিছে এক গুৰুত্বপূৰ্ণ পদক্ষেপ । সেইমৰ্মে বনৰীয়া হাতীৰ জাকৰ দলপতি হাতীটোৰ গাত অত্যাধুনিক যন্ত্ৰ স্থাপন কৰি উপগ্ৰহৰ যোগেদি দলটোৰ গতি-বিধি লক্ষ্য কৰি সম্ভাব্য উপস্থিতি নিৰ্ধাৰণ কৰি দলটোৰ পৰা হ’ব পৰা ক্ষয়-ক্ষতি কমোৱাৰ লগতে দলটোৰ দিশ সলনি কৰিব পৰা যাব ৷

বাক্সা আৰু তামুলপুৰ জিলাৰ সীমান্তৱৰ্তী জাৰতালুক অঞ্চলত দুদিনীয়া নেৰানেপেৰা প্ৰচেষ্টাৰ অন্তত ১৮ নৱেম্বৰত বনৰীয়া হাতীৰ এটা জাকৰ দলপতি মখনা এটাৰ গাত ৰেডিঅ' ক'লাৰ স্থাপন কৰিবলৈ সক্ষম হয় বাক্সাৰ বন বিভাগ । ইয়াৰ ফলত হাতীৰ জাকটোৰ গতিবিধি উপগ্ৰহৰ জৰিয়তে নিৰীক্ষণ কৰিবলৈ সক্ষম হ'ব জিলা প্ৰশাসনৰ লগতে বন বিভাগে ৷ জনাঞ্চলত হাতীৰ উপস্থিতিৰো আগতীয়াকৈ উমান পোৱা যাব । ৰেডিঅ’ ক'লাৰিং প্ৰকল্পটো হৈছে ভাৰত চৰকাৰ আৰু অসম চৰকাৰৰ এক উল্লেখনীয় পদক্ষেপ ।

বন্যহস্তীৰ দেহত ৰেডিঅ' ক'লাৰ স্থাপন (ETV Bharat Assam)

"অপাৰেছন ৰেডিঅ’ ক'লাৰিং প্ৰকল্প"ৰ সৈতে জড়িত আছে বাক্সা জিলাৰ বন বিষয়া, পদ্মশ্ৰী ডাঃ কুশল কুমাৰ শৰ্মা আৰু মানস টাইগাৰ ৰিজাৰ্ভৰ বন পশু চিকিৎসা বিষয়া ডাঃ বি চৌধুৰী । বাক্সা, তামুলপুৰ আৰু নলবাৰী জিলা প্ৰশাসনে বন বিভাগক "অপাৰেছন ৰেডিঅ’ ক'লাৰিং প্ৰকল্প" সফলতাৰে সম্পন্ন কৰিবলৈ সহযোগিতা আগবঢ়ায় । বাক্সা-তামুলপুৰ জিলাৰ সীমান্তৱৰ্তী জাৰতালুকৰ দলঙৰ ওচৰত ১৮ নৱেম্বৰত মতা হাতীটোক ট্ৰেংকুলাইজ্ড কৰি ৰেডিঅ’ ক'লাৰিং সফলতাৰে সম্পন্ন কৰা হয় ।

ৰেডিঅ’ কলাৰ কি:

স্বাভাৱিকতেই আপোনাৰ জানিবলৈ মন যাব যে এই ৰেডিঅ’ কলাৰ কি ? এই ৰেডিঅ’ কলাৰ হৈছে এবিধ সৰু ৰেডিঅ' ট্ৰেন্সমিটাৰ আৰু বেটাৰীযুক্ত মেচিন সংলগ্ন এডাল বহল বেল্ট। এই বেল্টডাল জন্তুৰ দেহত স্থাপন কৰি জন্তুটোৰ প্ৰাকৃতিক গতি-বিধি নিৰীক্ষণ কৰিব পৰা যায় । বেল্টডালত সংলগ্ন ট্ৰেন্সমিটাৰটোৱে এটা নিৰ্দিষ্ট কম্পনাংকত সংকেত নিৰ্গত কৰে ৷ এই সংকেতে ৫ কিলোমিটাৰ পৰ্যন্ত যিটো জন্তুৰ দেহত সংলগ্ন কৰা হয়, তাৰ উপস্থিতিৰ উমান দিব পাৰে ।

কম খৰচী ৰেডিঅ' ক'লাৰ নিৰ্মাণৰ বাবে গুৱাহাটী আই আই টিৰে কৰিব আলোচনা:

ৰেডিঅ' কলাৰিঙৰ খৰচ সামগ্ৰিকভাৱে ৭-৮ লাখ টকা, যিটো জিলা প্ৰশাসনে বহন কৰাটো প্ৰায় অসম্ভৱ । সেয়ে যোৱা ১৪ নৱেম্বৰত বাক্সা জিলাৰ আয়ুক্ত পংকজ চক্ৰৱৰ্তীৰ অধ্যক্ষতাত অনুষ্ঠিত এখন সভাত তামুলপুৰ জিলা প্ৰশাসনে গুৱাহাটীৰ আই আই টিৰ সৈতে বন্যহস্তী অথবা যিকোনো বন্যপ্ৰাণীৰ সন্ধানৰ বাবে কম খৰচী থলুৱা ৰেডিঅ' ক'লাৰ নিৰ্মাণৰ বাবে আলোচনা কৰাৰ সিদ্ধান্ত গ্ৰহণ কৰা হয় ‌। যদি সেয়া সম্ভৱ হয়, তেন্তে হস্তী-মানুহৰ সংঘাত বহু হ্ৰাস পাব আশা কৰা হৈছে । উল্লেখ্য যে চলিত বৰ্ষত জিলাখনৰ কুমাৰীকাটা বনাঞ্চলত ৪গৰাকী লোকৰ হাতীৰ আক্ৰমণত প্ৰাণহানি হোৱাৰ উপৰি এগৰাকী লোক আহত হৈছে ।

লগতে পঢ়ক:বনৰীয়া হাতীক মৰম দিলে তাৰ প্ৰত্যুত্তৰো হাতীয়ে মৰমেৰেই দিয়ে; হাতী বন্ধুৰ কথাৰে...