মৰাণ, ১০ মাৰ্চ:সমাগত লোকসভা নিবাৰ্চনক লৈ শাসক বিৰোধী সকলো ৰাজনৈতিক দল অধিক তৎপৰ হৈছে । শাসক দল বিজেপিক প্ৰতিহত কৰিবলৈ বিৰোধী ৰাজনৈতিক দলসমূহে বিভিন্ন ধৰণেৰে পৰিকল্পনা কৰাৰ সময়ত লোকসভা নিৰ্বাচনৰ প্ৰাকক্ষণত বিকাশ যাত্ৰা কাৰ্যসূচীৰে ৰাইজৰ কাষ চাপিছে বিজেপি চৰকাৰ । ইয়াৰে অংশ ৰূপে দেওবাৰে লাহোৱালৰ হেজেলবেংক আৰু মটক চাহ বাগিচাৰ প্ৰেক্ষাগৃহত অনুষ্ঠিত হয় বিকাশ যাত্ৰা অনুষ্ঠান । এই অনুষ্ঠানত মুখ্য অতিথি হিচাপে অংশগ্ৰহণ কৰে উদ্যোগ, বাণিজ্য, ৰাজহুৱা প্ৰতিষ্ঠান আৰু সাংস্কৃতিক পৰিক্ৰমা বিভাগৰ মন্ত্ৰী বিমল বড়া, কেন্দ্ৰীয় পেট্ৰ'লিয়াম আৰু প্ৰাকৃতিক গেছ শ্ৰম আৰু নিয়োগ দপ্তৰ মন্ত্ৰী ৰামেশ্বৰ তেলী, লাহোৱাল বিধানসভা সমষ্টিৰ বিধায়ক বিনোদ হাজৰিকাই ।
এই অনুষ্ঠানত ঝুমুৰ গীত গাই বিকাশ যাত্ৰা কাৰ্যসূচীত অংশগ্ৰহণ কৰিলে সাংস্কৃতিক পৰিক্ৰমা বিভাগৰ মন্ত্ৰী বিমল বড়াই । লগতে হেজেলবেংক চাহ বাগিচাত মহাপ্ৰভূ জগন্নাথ সামূহিক আৰু দক্ষতা বিকাশ কেন্দ্ৰৰ আধাৰশিলা, লাহোৱাল উচ্চ মাধ্যমিক বিদ্যালয়ৰ আধাৰশিলা, গ্ৰীণউদ চাহ বাগিচাত মহাপ্ৰভূ জগন্নাথ সামূহিক আৰু দক্ষতা বিকাশ কেন্দ্ৰৰ আধাৰশিলা, চেংধৰা চাহ বাগিচাত মহাপ্ৰভূ জগন্নাথ সামূহিক আৰু দক্ষতা বিকাশ কেন্দ্ৰৰ আধাৰশিলা, তামুলবাৰী চাহ বাগিচাত মহাপ্ৰভূ জগন্নাথ সামূহিক আৰু দক্ষতা বিকাশ কেন্দ্ৰৰ আধাৰশিলা স্থাপন কৰা হয় ।