ধিং:অচিনাক্ত বিষাক্ত পোকৰ আতংক । অচিনাক্ত বিষাক্ত পোকৰ দংশনত এজন যুৱকে অকালতে প্ৰাণ হেৰুওৱা ঘটনাৰ আতংক মাৰ নৌযাওতেই এইবাৰ ধিংত এনে পোকৰ বাবে শংকিত হৈ পৰিছে ৰাইজ । ইতিমধ্যে যতীন শইকীয়া নামৰ এজন যুৱকে এনে পোকৰ আক্ৰমণত প্ৰাণ হেৰুওৱাৰ পিচত বিষাক্ত পোকে হাহাকাৰ লগাইছে বৃহত্তৰ অঞ্চলটোত ।
ইপিনে,সমান্তৰালভাৱে ধিঙৰ নিকটৱৰ্তী কিছুমান গাঁৱত ৰাইজৰ মাজত আতংকৰ বিৰাজ কৰিছে । শনিবাৰে পুৱাই এনে বিষাক্ত পোকে জুৰীয়াৰ সুতিৰপাৰতো সন্ত্ৰাস চলাইছে । চৰ অঞ্চলটোত আগুৰি ধৰিছে এনে বিশেষ বিষাক্ত পোকে । আতংকিত সুতিৰপাৰ চৰবাসীয়ে বিচাৰিছে পৰিত্ৰাণৰ উপায় ।
বিষাক্ত পোকে নিদ্ৰা হৰিছে ধিংবাসীৰ (ETV Bharat Assam) আতংকিত নহৈ সতৰ্ক হ'বলৈ আহ্বান
চিকৰাৰ দৰে এই বিশেষ পোকটিয়ে আকৌ কোনো শব্দ নকৰে । সুতিৰপাৰত এতিয়ালৈকে ২৯ জন লোক এই পোকৰ আক্ৰমণৰ বলি হৈছে । এই লৈ ৰাইজৰ মাজত আতংকই বিৰাজ কৰাৰ মাজতেই আজি নগাঁও জিলাৰ স্বাস্থ্য বিভাগৰ যুটীয়া সঞ্চালক ডাঃ ফণী পাঠকে ৰাইজক আতংকিত নহৈ সতৰ্ক হ'বলৈ আহ্বান জনাইছে ।
নগাঁও জিলাৰ স্বাস্থ্য বিভাগৰ যুটীয়া সঞ্চালক কয় যে এই পোকে আক্ৰমণ কৰা লোকক বিভিন্ন পৰীক্ষা কৰা হৈছে যদিও এই সন্দৰ্ভত নিশ্চিত হ'ব পৰা নাই । যুটীয়া সঞ্চালকগৰাকীয়ে এই বিষয়ে উল্লেখ কৰি কয়," কিছুমান পোক আছে চকুৰে দেখা পোৱা নাযায় । সেই বিলাক পোক এন্দুৰ, নিগনিৰ লগতে মিলি থাকে ।" চৰ অঞ্চলতো সোমাই পৰা এনে বিষাক্ত পোকটো বিজ্ঞানসন্মত অধ্যয়নৰ জৰিয়তে কাবু কৰিব নোৱাৰিলে অতি সোনকালেই ভয়ংকৰ পৰিস্থিতিৰ সৃষ্টি হোৱাৰ আশংকা আছে ।
