পেট্ৰ’ল ভৰোৱাৰ পিচতে বিকল বাহন, পেট্ৰ'ল পাম্পত উত্তপ্ত পৰিস্থিতি - Thelamara assam oil petrol pump

Tense situation in petrol pump: পেট্ৰ'ল পাম্পত উত্তপ্ত পৰিস্থিতি ৷ শোণিতপুৰ জিলাৰ ঠেলামৰাৰ আছাম অইল পেট্ৰ’ল পাম্পত সংঘটিত হৈছে এই ঘটনা ৷ পেট্ৰ'লৰ পৰিৱৰ্তে পানী যোগানৰ অভিযোগ পেট্ৰ'ল ডিপোটোৰ বিৰুদ্ধে ৷ পৰিস্থিতি নিয়ন্ত্ৰণ কৰিবলৈ আৰক্ষী মোতায়েন ৷

তেজপুৰ, 12 জুন: শোণিতপুৰ জিলাৰ ঠেলামৰা ৰাজহ চক্ৰৰ ঠেলামৰাৰ আছাম অইল পেট্ৰ’ল ডিপোত উত্তপ্ত পৰিস্থিতি ৷ পেট্ৰ'লৰ পৰিৱৰ্তে পানী দিয়াৰ অভিযোগত পেট্ৰ'ল ডিপোটোত মঙলবাৰৰ নিশা সৃষ্টি হয় উত্তপ্ত পৰিস্থিতি ৷ পেট্ৰ’লৰ বিপৰীতে ডিপোটোৱে পানী যোগান ধৰাৰ বাবেই শতাধিক যান-বাহন বিকল হৈ পৰা বুলি ভুক্তভোগী গ্ৰাহকসকলে অভিযোগ তুলিছে ৷

জানিব পৰা মতে, ঠেলামৰাৰ উক্ত আছাম অইল পেট্ৰল ডিপোটোৰ পৰা নিজৰ নিজৰ যান-বাহনবোৰত পেট্ৰ’ল ভৰোৱাৰ পিছতেই গ্ৰাহকসকলৰ বাহনবোৰ বিকল হৈ পৰে ৷ পিছত ভুক্তভোগী গ্ৰাহকসকলে তেলৰ টেংকী খুলি পৰীক্ষা কৰি চাই টেংকীত পেট্ৰ’লৰ বিপৰীতে পানী আছে বুলি অৱগত হয় ৷

পেট্ৰ'ল পাম্পত উত্তপ্ত পৰিস্থিতি (ETV Bharat Assam)

সমগ্ৰ ঘটনা পোহৰলৈ অহাৰ পাচতে ডিপোটোৰ বিৰুদ্ধে ক্ষোভ প্ৰকাশ কৰি গ্ৰাহকসকলে ক্ষতিপূৰণ বিচাৰি ডিপোটোত সৃষ্টি কৰে উত্তপ্ত পৰিস্থিতি ৷ ইয়াৰ পাচতে ঘটনাস্থলীত উপস্থিত হয় আৰক্ষী ৷ ঘটনাস্থলীত আৰক্ষী উপস্থিত হৈ পৰিস্থিতি নিয়ন্ত্ৰণ কৰাৰ বাবে চেষ্টা কৰে ৷

ভুক্তভোগী লোকসকলে বিকল হোৱা যান-বাহনৰ ক্ষতিপূৰণ প্ৰদানৰ বাবে ডিপোটোৰ কৰ্তৃপক্ষৰ ওচৰত দাবী তোলাৰ লগতে ভেজাল ইন্ধন বিক্ৰী কৰা ঠেলামৰা পেট্ৰ’ল পাম্পটো বন্ধ কৰি দিবৰ বাবেও প্ৰশাসনৰ ওচৰত দাবী তুলিছে ৷

ইন্ধনৰ পৰিৱৰ্তে পানী থকাৰ সন্দেহ (ETV Bharat Assam)

দুৰ্ভাগ্যজনক বিষয় যে, ৰাজ্যত ক্ৰমাৎ বৃদ্ধি হোৱা পৰিলক্ষিত হৈছে এনেবোৰ ঘটনা ৷ সঘনাই সংঘটিত হৈ অহা এনেবোৰ ঘটনাই গ্ৰাহক তথা সচেতন লোকৰ মনত তীব্ৰ প্ৰতিক্ৰিয়াৰ সৃষ্টি কৰা পৰিলক্ষিত হৈছে ৷ কিছুদিন পূৰ্বে বাক্সাৰ বৰমাৰ এটা পেট্ৰ’ল পাম্পটো অনুৰূপ পৰিস্থিতি সৃষ্টি হৈছিল ৷ যাক লৈও উত্তপ্ত হৈছিল পৰিস্থিতি ৷

লগতে পঢ়ক:পেট্ৰ’ল ভৰোৱাৰ পূৰ্বে সাৱধান হওঁক; পেট্ৰ’লৰ নামত আপুনিও ভৰাইছে নেকি পানী ? - tense situation in petrol pump