গুলী চালনাৰে আতংকৰ সৃষ্টি কৰি ৰঙা ঘৰৰ আলহী হ’ল খোদ আৰক্ষী বিষয়া ! আচলতে হৈছিল কি ! - Firing Incident

Firing Incident : বিনা কাৰণত গুলী চালনা কৰি আটক এগৰাকী আৰক্ষী বিষয়া ৷ গুলী চালনা কৰি ঘটনাস্থলীৰ পৰা আঁতৰি যায় অভিযুক্ত আৰক্ষী বিষয়াজন ৷ ইতিমধ্যে আৰক্ষীৰ জিম্মাত আছে অভিযুক্ত বিষয়াজন ৷

বঙাইগাঁও, 2 জুন : ছাৰ্ভিছ পিষ্টলেৰে গুলীচালনা কৰি আৰক্ষীৰ জিম্মাত আৰক্ষী ৷ কোনো কাৰণ নোহোৱাকৈ নিজৰ ছাৰ্ভিছ পিষ্টেলেৰে তিনি জাঁই গুলী চালনা কৰি বৰ্তমান আৰক্ষীৰ জিম্মাত আছে এজন আৰক্ষী বিষয়া ৷ বঙাইগাঁও জিলাৰ মাণিকপুৰৰ পাতিলাদহা গাৰোলেটি গাঁৱত সংঘটিত হৈছে এই ঘটনা ৷ শনিবাৰে সন্ধিয়া সংঘটিত হয় এই ঘটনা ৷

অভিযোগ অনুসৰি সৰভোগৰ নিবাসী তথা কাজলগাঁওস্থিত চিৰাঙ জিলা আৰক্ষী চাউনীৰ ASI বিপ্লৱ দাসে শনিবাৰে সন্ধিয়া নিজৰ দায়িত্ব সামৰি নিজ ঘৰলৈ যোৱাৰ সময়তে মাণিকপুৰৰ পাতিলাদহা গাৰোলেটি গাঁৱৰ ৰঞ্জিত নাথৰ ঘৰত সোমায় ৷ ইয়াতে পূৰ্বৰ পৰাই চিনাকী ৰঞ্জিত নাথৰ পুত্ৰ জ্যোতিষ নাথৰ লগত কিছু সময় কথা পাতে আৰক্ষী বিষয়াজনে ৷ কিন্তু কথা পাতি থকাৰ মাজতে নিজৰ ছাৰ্ভিছ পিষ্টলৰে ৰঞ্জিত নাথৰ ঘৰৰ ছিৰিত গুলীচালনা কৰে ASI বিপ্লৱ দাসে ৷ অভিযোগ অনুসৰি ব্যক্তিজনৰ ঘৰত মুঠ তিনি জাঁই গুলী চালনা কৰি ঘটনাস্থলীৰ পৰা আঁতৰি যায় অভিযুক্ত আৰক্ষী বিষয়া বিপ্লৱ দাস ৷

আৰক্ষী বিষয়াজনৰ এই গুলী চালনাত কোনো লোক হতাহত হোৱা নাই যদিও ৰঞ্জিত নাথৰ পৰিয়াল এই ঘটনাত আতংকিত হৈ দিগ-বিদিগ হেৰুৱাই ৷ পৰৱৰ্তী সময়ত ৰঞ্জিত নাথৰ পুত্ৰ জ্যোতিষ নাথে ঘটনা সন্দৰ্ভত এজাহাৰ দাখিল কৰে ৷ এই এজাহাৰৰ ভিত্তিত আৰক্ষীয়ে বিপ্লৱ দাসক নিজ গৃহৰ পৰা আটক কৰে ৷ সম্প্ৰতি বিপ্লৱ দাস মাণিকপুৰ আৰক্ষীৰ জিম্মাত আছে বুলি জানিব পৰা গৈছে ৷ জ্যোতিষ নাথে সাংবাদিকৰ আগত উল্লেখ কৰা মতে সুৰাৰ নিচাত নিজৰ ছাৰ্ভিছ পিষ্টলৰে গুলী চালনা কৰে ASI বিপ্লৱ দাসে ৷ ঘটনা সন্দৰ্ভত মাণিকপুৰ আৰক্ষীয়ে তদন্ত অব্যাহত ৰাখিছে ৷

লগতে পঢ়ক :গুৱাহাটীত ছুৰিকাঘাতৰ ঘটনা: আৰক্ষীৰ জালত উদভ্ৰান্ত প্ৰেমিক ! - Stabbing Incident In Guwahati

লগতে পঢ়ক :ড্ৰাগছ আসক্ত যুৱকৰ ছুৰীকাঘাতত তেজেৰে লুতুৰি পুতুৰি এজন - ATTEMPTED TO MURDER